იუსტიციის მინისტრის, თეა წულუკიანის, განცხადებით, თუ საქართველოს მესამე პრეზიდენტი ამერიკის შეერთებულ შტატებში გადავა, საქართველო ამერიკასთან დაიწყებს მოლაპარაკებებს, მის გადმოსაცემად. მიხეილ სააკაშვილი ამ დროისთვის ნიუ-იორკში იმყოფება.

"თუკი უკრაინაში გაჩნდა პოლიტიკური ნება საქართველოსთან ამ საქმეზე თანამშრომლობის, მათ შეუძლიათ მიიღონ გადაწყვეტილება მოცემული ბრალდებულის გადმოცემის შესახებ. რაც შეეხება სხვა სახელმწიფოებს, მათ შორის ამერიკის შეერთებულ შტატებს, თუ ყოფილი პრეზიდენტი იქ დაიდებს ბინას, რა თქმა უნდა ჩვენ დაგვჭირდება უკვე ამ ქვეყნებთან სამართლებრივი კონსულტაციები, მათ შორის მოლაპარაკებები და შეთანხმება, გადმოცემის შესახებ" - განაცხადა წულუკიანმა ჟურნალისტებთან საუბრისას.

სააკაშვილისთვის უკრაინის მოქალაქეობის ჩამორთმევის შესახებ ინფორმაცია 26 ივლისს გავრცელდა. ოდესის ყოფილი გუბერნატორის თქმით, უკრაინის პრეზიდენტი, პეტრო პოროშენკო, საქართველოში ვიზიტისას ბიძინა ივანიშვილს შეხვდა. მისივე მტკიცებით, საუბრის ერთ-ერთი თემა თავად იყო.

მოგვიანებით, ლიტველი ევროპარლამენტარი, პეტრას აუსტრევიჩუსი, საქართველოს ყოფილი პრეზიდენტისთვის, მიხეილ სააკაშვილისთვის ბინადრობის უფლების, მოგვიანებით კი ლიტვის მოქალაქეობის მინიჭების ინიციატივით გამოვიდა.

წულუკიანის თქმით, როგორც კი სააკაშვილი უკრაინაში დაბრუნდება, მათ მისი საქართველოსთვის გადმოცემა და ორი წლის წინ გაგზავნილილი ექსტრადირების მოთხოვნის შესრულება შეეძლებათ.