"არ შეესაბამება სიმართლეს", — ასე გამოეხმაურა პარლამენტის თავმჯდომარე, შალვა პაპუაშვილი საქართველოში საფრანგეთის ელჩის განცხადებას, რომ საქართველოს ბიუჯეტში პირდაპირ დახმარებას საფრანგეთი შეაჩერებს.

პაპუაშვილის მტკიცებით, საფრანგეთის ბიუჯეტიდან საქართველოს ბიუჯეტში არანაირი თანხა არ შედის, "ამიტომ, ცოტა გაუგებარია, რას ეხებოდა ეს განცხადება".

კითხვაზე, აფინანსებს თუ არა საფრანგეთი მთავრობის პროგრამებს, პაპუაშვილი ამბობს, რომ "პროგრამები, რა თქმა უნდა, არსებობს", თუმცა, საბიუჯეტო დახმარებას საქართველო საფრანგეთისგან არ იღებს.

გუშინ, 11 ივლისს, საქართველოში საფრანგეთის ელჩმა შერაზ გასრიმ განაცხადა, რომ 27 ივნისს, ევროპულმა საბჭომ დაასკვნა, რომ ევროკავშირში გაწევრიანების გზა იყო დე ფაქტო შეჩერებული, რაც საქართველოს მთავრობის მიერ მიღებული გადაწყვეტილებების შედეგია.

მისივე თქმით, ამ მიზეზით, მათ მიიღეს გადაწყვეტილება, რომ დროებით შეაჩერონ დახმარება საქართველოს ბიუჯეტში და დახმარება სამოქალაქო საზოგადოებასა და მედიას გაუძლიერონ.