კომპანია გლოვო, მათ კურიერზე თავდასხმის ფაქტს ეხმაურება და აცხადებს, რომ ღიაა სამართალდამცავ ორგანოებთან თანამშრომლობისთვის და თავადაც იკვლევს ინციდენტის გარემოებებს.

"ინციდენტის შეტყობინების წუთიდან ჩვენ ვინარჩუნებდით მჭიდრო კავშირს კურიერის ოჯახთან, უზრუნველვყავით ყოვლისმომცველი მხარდაჭერა და დამატებითი მითითებები შემდგომ ნაბიჯებთან დაკავშირებით", — წერს კომპანია.

მათივე თქმით, გლოვო კურიერის ოჯახს ფინანსურადაც დაეხმარება: "გლოვოს პარტნიორი კურიერების უსაფრთხოება და კეთილდღეობა ჩვენთვის უმნიშვნელოვანესია".

6 ივლისს, თბილისში, ნუცუბიძის მე-4 მიკრორაიონის მიმდებარე ტერიტორიაზე, ბრალდებულს თანმხლებ ორ პირთან ერთად, საკურიერო მომსახურებასთან დაკავშირებით შელაპარაკება მოუხდა დაზარალებულთან, რა დროსაც ფიზიკურად გაუსწორდა მას და ცეცხლსასროლი იარაღიდან რამდენიმე გასროლით დაზიანებები მიაყენა.

პროკურატურამ კურიერის მიმართ ჯანმრთელობის განზრახ მძიმე დაზიანების და ცეცხლსასროლი იარაღის მართლსაწინააღმდეგო შეძენა, შენახვის და ტარების ფაქტებზე ერთ პირს ბრალდება დაუსწრებლად წარუდგინა.

ბრალდება 4-7 წლამდე პატიმრობას ითვალისწინებს.