მოამზადეთ საუკეთესო ლუქები — ლეგენდარული მირანდა პრისლი მალე განაგრძობს ჩვენი სტილის კრიტიკას! ეშმაკს აცვია პრადა 2-ს გადაღებები უკვე დაიწყო.

ფოტო: ELLE

2006 წლის ფილმის მეორე ნაწილს ორიგინალი ქასთის მონაწილეობით დისნეი იღებს — მოდის ჟურნალი Runway-ს მთავარი რედაქტორის, მირანდა პრისლის როლს მერილ სტრიპი შეასრულებს, მისი ასისტენტების, ანდრეასა და ემილის როლში კი კვლავ ენ ჰეთეუეისა და ემილი ბლანტს ვიხილავთ.

ჯერჯერობით უცნობია, კიდევ რომელი მსახიობები შემოუერთდებიან ქასთს, თუმცა, როგორც ირკვევა, ფილმის ცენტრალური ფიგურა მირანდა პრისლი იქნება, რომელიც ტრადიციული ბეჭდური მედიის ციფრულით ჩანაცვლების ეპოქაში ცდილობს კარიერული წარმატებების მიღწევას. მირანდას მთავარი კონკურენტი ემილი ბლანტის პერსონაჟი იქნება, მისი ყოფილი ასისტენტი, რომელიც უკვე მდიდრული ბიზნეს ჯგუფის გავლენიანი აღმასრულებელი დირექტორია.

ეს სერიოზულად გაცვია?

ფოტო: Tenor

როგორც ცნობილია, დისნეი მოლაპარაკებას აწარმოებს პირველი ნაწილის სცენარისტთან, ალინ ბროშ მაკენასთან, რათა მეორე ნაწილის სიუჟეტი საკულტოდ ქცეული ეშმაკს აცვია პრადას თავდაპირველი ჩანაფიქრებისა და მოტივების ბუნებრივი გაგრძელება გახდეს.

ფოტო: The Telegraph

ეშმაკს აცვია პრადა იმ ფილმების კატეგორიას მიეკუთვნება, რომლებიც ეკრანებზე გამოჩენიდან ათწლეულების შემდეგაც არ კარგავენ რელევანტურობასა და პოპულარობას — ინტერნეტსივრცეში ყოველდღიურად გვხვდება ფილმით შთაგონებული მიმები, ახალი პერსპექტივიდან დანახული ნიუანსები, მირანდა პრისლის გონებამახვილი ციტატები და ა.შ. მერილ სტრიპმა ამ როლისთვის ოქროს გლობუსი და ოსკარის ნომინაციაც მოიპოვა.