თავდაცვის მინისტრმა ლევან იზორიამ დღეს, ღირსეული პარტნიორის გახსნის ცერემონიალზე ჟურნალისტებს განუცხადა, რომ ისინი გმობენ რუსეთის ფედერაციის ნებისმიერ ქმედებას საქართველოს ოკუპირებულ ტერიტორიებზე, მათ შორის ე.წ. წვრთნებს.

ჩრდილოეთ კავკასიასა და ოკუპირებულ სამხრეთ ოსეთში, რუსეთის არმიის მასშტაბურ წვრთნების დაწყების შესახებ ინფორმაცია, რამდენიმე დღის წინ გავრცელდა.

ლევან იზორიამ ასევე ღირსეული პარტნიორი 2017-ის შესახებაც ისაუბრა და თქვა რომ წვრთნების მიზანია მეტი უსაფრთხოება ქვეყანაში:

"2800 სამხედრო მოსამსახურე, 500-მდე ერთეული ტექნიკის მონაწილეობით, ემსახურება იმ მიზანს რომ რეგიონში განმტკიცდეს სტაბილურობა და უსაფრთხოება".

ღირსეული პარტნიორი 2017 ოფიციალურად დღეს, 30 ივლისს, ვაზიანის აეროდრომზე გაიხსნა. წელს, მისი მასშტაბები გაიზარდა და მასში ნატოს ხუთი წევრი და სამი პარტნიორი ქვეყნის შეიარაღებული ძალების ქვედანაყოფები მონაწილეობს - აშშ, დიდი ბრიტანეთი, გერმანია, სლოვენია, თურქეთი, უკრაინა, სომხეთი და საქართველო. ღირსეული პარტნიორი საქართველოში წელს უკვე მესამედ ტარდება.