საქართველოს ენერგეტიკისა და წყალმომარაგების ეროვნულმა მარეგულირებელმა კომისიამ 2017 წლის 21 ივლისს დადგენილება მიიღო, სადაც განსაზღვრულია ის შემთხვევები, როცა კომპანია დენის, წყლისა და გაზის დავალიანების გამო მომსახურების მიწოდებას ვეღარ შეწყვეტს. შესაბამისი დადგენილებები უკვე ძალაშია.

დადგენილების მიხედვით, ასეთი შემთხვევებია:

  • საღამოს საათები;
  • შაბათ-კვირა;
  • უქმე დღეები;
  • უქმე დღეების წინა დღეები.

ამავე დადგენილებებით, განისაზღვრა ის მაქსიმალური ვადა, როცა დავალიანების გადაიხდიან კომპანიამ მომსახურების მიწოდება უნდა განაახლოს. ამ წესის მიხედვით, აბონენტს მომსახურების მიწოდება უნდა აღუდგეს გადახდის დამადასტურებელი ქვითრის წარდგენიდან, თანხის ასახვიდან, ან გადანაწილების შესახებ ხელშეკრულების გაფორმებიდან არაუმეტეს ხუთ საათში. ეს წესი მოქმედებს იმ შემთხვევაში, თუ მსგავსი ინფორმაცია კომპანიას 9 საათიდან 16 საათამდე მიაწოდეს, მაღალმთიან რეგიონებში დრო 14 საათამდეა. იმ შემთხვევაში, თუ ამ ვადაში კომპანიას არ მიაწოდა შესაბამისი ინფორმაცია აბონენტმა, მას მომსახურება უნდა აღდგეს მომდევნო კალენდარული დღის 12 საათამდე.

სემეკის გადაწყვეტილებითვე, შესაბამისი მომსახურების მიმწოდებელ კომპანიებს ვალდებულება აქვთ გეგმურ წყვეტამდე სარემონტო სამუშაოების შესახებ, ტექსტური შეტყობინებით აცნობოს შესაბამის არეალში არსებულ მომხმარებლებს სამუშაოების დაწყებამდე არაუმეტეს ხუთი და არანაკლებ ერთი კალენდარული დღით ადრე მაინც. შეტყობინებაში მითითებული უნდა იყოს სამუშაოს დაწყებისა და ხანგრძლივობის ზუსტი დრო.

"იმ შემთხვევაში, თუ დაგეგმილი სამუშაოების შედეგად მომარაგება უწყდება შესაბამის თვითმმართველ ერთეულში არსებულ მომხმარებელთა ორ პროცენტზე მეტს, მაგრამ
არანაკლებ 100 მომხმარებლისა, ზემოაღნიშნულ ვადაში განაწილების ლიცენზიანტმა ასევე უნდა
გაავრცელოს შესაბამისი ინფორმაცია მედიასაშუალებებით, მოქმედი კანონმდებლობით დადგენილი წესით. თუ განაწილების ლიცენზიატი ვერ ახერხებს გეგმური წყვეტის თაობაზე მომხმარებლის წინასწარ ინფორმირების ვადის დაცვას, ელექტროენერგიით მომარაგების შეწყვეტა უნდა გადავადდეს", - ვკითხულობთ სემეკის დადგენილებაში.

ამავე დოკუმენტის მიხედვით, თუ მომხმარებლის ინფორმირება დადგენილ ვადებში მაინც ვერ ხდება, ინფორმაცია კომპანიებმა მისი შეტყობისთანავე უნდა მიაწოდონ.