მოკლედ: საერთაშორისო გამჭვირვალობა — საქართველოს (TI) ინფორმაციით, თელავის რაიონული სასამართლოს მოსამართლე და თავმჯდომარე მარინე ცერცვაძე, 2023 წლის ქონებრივი მდგომარეობის დეკლარაციაში უძრავ ქონებებს და ხელფასს არ უთითებს.

  • მარინე ცერცვაძე 2019 წლიდან უვადო მოსამართლეა.

დეტალები: TI წერს, რომ მარინე ცერცვაძემ დეკლარაციაში არ მიუთითა მის საკუთრებაში არსებული ოთხი უძრავი ქონება:

  • 60 კვ.მ ბინა ბათუმში, ყაზბეგის ქუჩაზე;
  • 71.7 კვ.მ ბინა თელავში, მშვიდობის ქუჩაზე;
  • 105 კვ.მ მიწის ნაკვეთი თელავში, მშვიდობის ქუჩაზე;
  • 44 კვ.მ მიწის ნაკვეთი თელავში, მშვიდობის ქუჩაზე, მასზე არსებული შენობა ნაგებობით.

TI აღნიშნავს, რომ მარინე ცერცვაძემ ქონება არც 2022 წლის დეკლარაციაში ასახა.

  • ცერცვაძემ 2023 წლის დეკლარაციაში ასევე არ მიუთითა თანამდებობაზე მის მიერ 2022 წლის განმავლობაში მიღებული შრომის ანაზღაურება.

ბოლო ხაზი: საერთაშორისო გამჭვირვალობა — საქართველო მიმართავს ანტიკორუფციულ ბიუროს შეისწავლოს მარინე ცერცვაძის დეკლარაციაში გამოვლენილი დარღვევა და მოახდინოს შესაბამისი რეაგირება.

  • "ევროკომისიის რეკომენდაციის თანახმად, მოსამართლე მარინე ცერცვაძე, როგორც თელავის რაიონული სასამართლოს თავმჯდომარე, კეთილსინდისიერების შემოწმების მექანიზმს უნდა დაექვემდებაროს", — წერს TI.

ამ თემაზე: დაასრულებს თუ არა კეთილსინდისიერების შემოწმება სასამართლო კლანს