რა ხდება: ონის მუნიციპალიტეტის მერია ეხმაურება ფეა თრიიზ ფონდის განცხადებას, ონში ბავშვთა სტომატოლოგიური კლინიკის გახსნის პროექტის შეჩერების შესახებ.

  • ონის მერია წერს, რომ ფონდის განცხადება იაფფასიანი სპეკულაციაა, არასწორ ინფორმაციას შეიცავს და პოლიტიკურად მოტივირებულია.

დეტალები: ონის მერიის განცხადებით, ფონდის იდეა მოიცავდა მუნიციპალიტეტში მცხოვრები 2-დან 18 წლამდე ბავშვებისა და მოზარდებისთვის მხოლოდ და მხოლოდ სტომატოლოგიური მომსახურების გაწევას, რისთვის, მათი თქმით, საჭირო სივრცის კეთილმოწყობა და შესაბამისი ტექნიკით აღჭურვა, ონის მერიამ უზრუნველყო:

  • "ის ფაქტი კი, რომ ფონდმა გამოგონილი საბაბით უარი თქვა ერთადერთი ვალდებულების შესრულებაზე, რომლის ინიციატორიც თავად იყო და რომელიც მხოლოდ პროფესიული მომსახურების გაწევას გულისხმობდა, პოლიტიკურად მოტივირებული გადაწყვეტილება".
  • მათივე თქმით, პროექტის შეფერხების საფრთხე არ არსებობს და ის სრულად ონის მუნიციპალიტეტის მერიის მიერ დაფინანსდება.

კონტექსტი: გუშინ, 29 მაისს, არასამთავრობო ორგანიზაცია, ფეა თრიიზ ფონდმა განაცხადა, რომ რუსული კანონის მიღების გამო, ონში ბავშვთა სტომატოლოგიური კლინიკის გახსნის პროექტს აჩერებენ, რომელიც არასრულწლოვანებს უფასოდ უნდა მომსახურებოდა.

  • განცხადების მიხედვით, რუსული კანონი სერიოზულ გამოწვევას უქმნის ორგანიზაციას, რადგან აიძულებს საჯარო რეესტრში დარეგისტრირდნენ როგორც "უცხოური ინტერესების მატარებელი".