მოკლედ: კახელები მიმართავენ რუსული კანონის მხარდამჭერ კახელ დეპუტატებს, ირაკლი ქადაგიშვილს და დავით სონღულაშვილს, მხარი არ დაუჭირონ რუსულ კანონზე პრეზიდენტის ვეტოს დაძლევას.

დეტალები: "ბოლო შანსი გაქვთ, არ დაძლიოთ პრეზიდენტის ვეტო და მხარი დაუჭიროთ არა რუსული ორბიტისკენ შეტრიალებას, არამედ საქართველოს ევროპულ მომავალს. არ შეიძლება ჩვენ და თქვენ სხვადასხვა მიზანი გვქონდეს და სხვადასხვა რამ გვინდოდეს ქვეყნისთვის", — წერია მიმართვაში.

კახელები მიმართავენ

  • დავით სონღულაშვილს, "ევროპული განათლება საქართველოს ევროპული გზის დასაცავად გამოიყენოს და არა ევროპული გზის ძირის გამოსათხრელად".
  • ირაკლი ქადაგიშვილს — ნუ იმოქმედებს მტრის სასარგებლოდ და დადგეს ამომრჩევლის და ქართველი ხალხის მხარეს: "90-იანებიდან ქართულ პოლიტიკაში ხართ და თქვენ ბევრზე კარგად იცით, ვინ არის მტერი ჩვენი, ვინ — მეგობარი".

კონტექსტი: დღეს, 28 მაისს, 12:00 საათიდან პარლამენტი პლენარულ სხდომაზე განიხილავს პრეზიდენტის მოტივირებულ შენიშვნებს რუსულ კანონთან დაკავშირებით.

  • პარალელურად, 11 საათიდან, პარლამენტის უკანა შესასვლელთან რუსული კანონის მოწინააღმდეგეები არიან შეკრებილები.
  • პრეზიდენტის მოტივირებული შენიშვნები გუშინ იურიდიულ საკითხთა კომიტეტის სხდომაზე განიხილეს და მხარი არ დაუჭირეს.