რა ხდება: თბილისში ოფიციალური ვიზიტით იმყოფებიან გერმანიის, პოლონეთის, ჩეხეთისა და ლიეტუვის საგარეო ურთიერთობათა კომიტეტის თავმჯდომარეები.

  • ისინი მეორე დღეა მართავენ შეხვედრებს. შეხვდნენ საქართველოს პრეზიდენტს, სალომე ზურაბიშვილს, სამოქალაქო სექტორის წარმომადგენლებსა და ოპოზიციას, თუმცა, ხელისუფლების ოფიციალური პირები მათთან შეხვედრაზე უარს ამბობენ.

პაველ ფიშერი, ჩეხეთის საგარეო საქმეთა კომიტეტის თავმჯდომარე: "სამწუხაროდ, არ მოგვეცა პარლამენტში მისვლის საშუალება. თქვეს, რომ უსაფრთხოების მიზეზების გამო, თუმცა, ჩვენ მივიღეთ ეს, როგორც არის. არ მოგვეცა საშუალება, შეხვედროდით მთავრობის წარმომადგენლებს, თუმცა მოგვეცა შანსი, ქართული ოცნების ოფისში შეხვედროდით საგარეო კომიტეტის თავმჯდომარეს, ნიკოლოზ სამხარაძეს", — თქვა მან.

  • პაველ ფიშერმა აღნიშნა, რომ მათი საქართველოში ყოფნის მიზანია, განაცხადონ, რომ კანონი, რომელიც ხელისუფლებამ დღეს დაამტკიცა, "ძალიან არასწორი მიმართულებით გადადგმული ნაბიჯია."

ფიშერის თქმით,

  • ამ კანონის შესწორება არ გაალამაზებს სურათს;
  • კანონი თავად არის ძალიან არასწორი და შეუსაბამო
  • და რომ ხელისუფლების მიერ ინიციირებული ბოლო დროინდელი კანონპროექტები აჩვენებს ტრაექტორიას, რომელიც ევროინტეგრაციასთან შეუსაბამოა. მან დააკონკრეტა, რომ მხედველობაში აქვს კანონი უმცირესობებისა და ლგბტქ ადამიანების შესახებ, ოფშორების კანონი და კანონი ცენტრალური ბანკის უფლებამოსილების შესახებ.

"ქართული კოშმარი" — ასე აფასებს მდგომარეობას პოლონეთის საგარეო ურთიერთობათა კომიტეტის თავმჯდომარე ჟიგიმანტას პავილიონისი.

  • მისი თქმით, საქართველოსთვის რუსული კანონი უკუსვლას ნიშნავს და აკარგვინებს ევროინტეგრაციის შანსებს.

პავილიონისი: "ქართული კოშმარი” ახლა ყველაზე ცუდებთან შეჯიბრში იღებს მონაწილეობას. გამიგია, რომ უნგრეთი ცდილობს მსგავსი კანონის მიღებას, გამიგია, რომ ყირგიზეთმა მიიღო ცოტა ხნის წინ. ეს უკუმიმართულებაა. ევროკავშირში მოხვედრის შანსიც კი არ არსებობს. მხოლოდ საუკეთესოები შევლენ იქ, ისინი საუკეთესოები არ არიან."

ბოლო ხაზი: საქართველოში იმყოფება სახელმწიფო დეპარტამენტის მაღალჩინოსნი, ჯეიმს ო'ბრაიენი. ის ქართული ოცნების სათავო ოფისში რამდენიმე წუთის წინ მივიდა. იქადან გამოსვლის შემდეგ, მოსალოდნელია მისი პრესკონფერენცია მედიისთვის.