NDI-ს კვლევის მიხედვით, გამოკითხული მოსახლეობის 68 პროცენტი მიიჩნევს, რომ ადგილობრივ ხელისუფლებაში ნეპოტიზმის პრობლემაა. ამ მოსაზრებას მოსახლეობის მხოლოდ 15 პროცენტი არ ეთანხმება, 17 პროცენტმა კი "არ იცის"

ამავე კვლევის მიხედვით, მოსახლეობის 78 პროცენტი მიიჩნევს, რომ ადგილობრივ ხელისუფლებაში კომპეტენციის ნაკლებობაა, ამ მოსაზრებას მხოლოდ 14 პროცენტი არ ეთანხმება, დანარჩენმა კი ან არ იცის, ან პასუხს არ სცემს.

გამოკითხული მოსახლეობის თითქმის ნახევარი, 47 პროცენტი ამბობს, რომ ადგილობრივ ხელისუფლებაში კორუფციის პრობლემა არსებობს, ამ მოსაზრებას არ იზიარებს თითქმის მეოთხედი (26%), 27 პროცენტი ამბობს, რომ "არ იცის". დანარჩენი კი კითხვას პასუხს არ სცემს.

მიუხედავად ადგილობრივი ხელისუფლების მიმართ გამოთქმული პრეტენზიებისა, რაც ეხება არაპროფესიონალიზმს, ნეპოტიზმსა და კორუფციას, მოსახლეობის 68 პროცენტი მათ საქმიანობას საშუალოდ, კარგად ან ძალიან კარგად აფასებს. ადგილობრივი ხელისუფლების საქმიანობას ცუდად, ან ძალიან ცუდად 28 პროცენტი აფასებს, სამი პროცენტი კი პასუხობს, რომ "არ იცის".

კვლევა დიდი ბრიტანეთის მთავრობის, UK aid-ის ფინანსური ხელშეწყობით ჩატარდა, გამოკითხვას კი CRRC-საქართველო ატარებდა. კვლევის საველე სამუშაოები 18 ივნისი-9 ივლისის პერიოდში, საქართველოს მასშტაბით (ოკუპირებული ტერიტორიების გამოკლებით) შესრულდა. 2 261 პირი, პირისპირ ინტერვიუს სახით, წარმომადგენლობითი შერჩევით გამოიკითხა.