მოკლედ: იურიდიულ საკითხთა კომიტეტის თავმჯდომარე ანრი ოხანაშვილმა, კომიტეტის სხდომიდან, სადაც რუსულ კანონს მეორე მოსმენით განიხილავენ, დარბაზიდან გააძევა 14 ოპოზიციონერი დეპუტატი და არასამთავრობო სექტორის ორი წარმომადგენელი.

სულ ახლახან, მან მოუწოდა მანდატურის სამსახურს, დარბაზიდან გაეყვანათ თინა ბოკუჩავა და თეონა აქუბარდია.

ამასთან, მან კინოდარბაზიდან, სადაც კანონზე მსჯელობენ, გააძევა

  • საერთაშორისო გამჭვირვალობა — საქართველოს წარმომადგენელი ლიკა საჯაია;
  • რეგიონულ მაუწყებელთა ასოციაციის ხელმძღვანელი ნათია კუპრაშვილი.

დეტალები: ოხანაშვილმა არასამთავრობო სექტორის წარმომადგენლებს უთხრა, რომ ისინი სხდომაზე დეპუტატებისთვის შეურაცხყოფის მისაყენებლად მივიდნენ.

  • "დატოვეთ, დარბაზი. შეურაცხყოფას აყენებთ დეპუტატებს, ამის უფლებას არ მოგცემთ. უზრდელი ხართ, ეს არ არის გასაკვირი, მაგრამ სამწუხაროა, რომ ამას აკეთებთ სხდომათა დარბაზში. თქვენ იმის წარმოდგენა არ გაქვთ, სად ხართ, თქვენ განცდა არ გაქვთ, რომ ეს არის საქართველოს პარლამენტი, ამიტომ გაბრძანდით აქედან და ზრდილობა ისწავლეთ", — მიმართა ანრი ოხანაშვილმა ლიკა საჯაიას.

კონტექსტი: დღეს, 29 აპრილს, იურიდიულ საკითხთა კომიტეტის სხდომაზე რუსული კანონის მეორე მოსმენა, ხმაურისა და კამათის ფონზე მიმდინარეობს.

  • კომიტეტის თავმჯდომარემ დარბაზიდან გააძევა 14 ოპოზიციონერი დეპუტატი: ლევან ბეჟაშვილი, გიორგი ვაშაძე, სალომე სამადაშვილი, თამარ კორძაია, ანა წითლიძე, ქეთევან თურაზაშვილი, ხატია დეკანოიძე, დავით ხაჯიშვილი, ლევან ხაბეიშვილი, გიორგი გოდაბრელიძე, ნიკა მაჭუტაძე, თაკო ჩარკვიანი, თინა ბოკუჩავა, თეონა აქუბარდია.
  • გარდა ამისა, პროტესტის ნიშნად, სხდომათა დარბაზი დატოვეს ლელოს დეპუტატმა ანა ნაცვლიშვილმა, გირჩის ლიდერმა, იაგო ხვიჩიამ, სტრატეგია აღმაშენებლის წევრმა პაატა მანჯგალაძემ. ისინი მიიჩნევენ, რომ ოპოზიციის სხდომაზე დასწრება ბუტაფორიულია.

ოპოზიციონერი დეპუტატების გაძევებას არასამთავრობო ორგანიზაციები გამოეხმაურნენ. მათი განაცხადეს, რომ დეპუტატების გაძევებისა და ცენზურის ფონზე მიმდინარეობს.

გაიგე მეტი: რუსული კანონის საკომიტეტო მოსმენა დეპუტატების გაძევებისა და ცენზურის ფონზე მიმდინარეობს — არასამთავროები