თვითმმართველობის არჩევნებამდე სამი თვით ადრე, თბილისის მერიამ გადაწყვიტა, რომ ვაკის პარკის ტერიტორიული საზღვრები გაეზარდა, მისთვის კულტურული მემკვიდრეობის ძეგლის სტატუსი მიენიჭებინა და ასევე, დიღმის გასხვისებული ტყე-პარკის ნაწილი ქალაქისთვის დაებრუნებინა.

დღეს, 25 ივლისს, თბილისის მერმა, დავით ნარმანიამ პრესკონფერენციაზე თქვა, რომ ვაკის პარკს შეუერთდება კუს ტბის მიმდებარე ტერიტორია, მთლიანი ფართობი კი ერთ საკადასტრო კოდის ქვეშ მოექცევა.

დავით ნარმანიას ცნობით, დღეის მდგომარეობით, ვაკის პარკის ფართობი 18 ჰექტარს შეადგენს და კუს ტბის მიმდებარე ტერიტორიის შეერთების შემდეგ, პარკის საზღვრები 34 ჰექტრამდე გაიზრდება.

რაც შეეხება, დიღმის გასხვისებული ტყე-პარკის ნაწილის ქალაქისთვის დაბრუნებას, მერის განცხადებით, საუბარია 10 ათასი მ2 მიწის ნაკვეთზე. ნარმანიას თქმით, ეს არის მისი ერთ-ერთი საარჩევნო დაპირება.

როგორც დედაქალაქის მერია აცხადებს, ჯამში, თბილისს დაუბრუნდა სხვადასხვა დროს გასხვისებული 9 489 მ2 მიწის ნაკვეთი, მათ შორის სკვერი ყაზბეგის გამზირზე, ტერიტორია შავი ზღვისა და აწყურის ქუჩების გადაკვეთაზე (განხორციელდა ბენზინგასამართი სადგურის დემონტაჟი და მოეწყო სკვერი) და სხვ.