აჭარის ავტონომიური რესპუბლიკის პროკურატურის საგამოძიებო ნაწილმა, ცეცხლსასროლი იარაღის გამოყენებით ხულიგნობის ჩადენის ბრალდებით, შსს-ს დეტექტივის თანაშემწე-გამომძიებელი დააკავა. ხულიგნობით დაკავებული პირის შესახებ ინფორმაციას საქართველოს მთავარი პროკურატურა ავრცელებს.

უწყების ინფორმაციით, 2017 წლის 21 ივნისს, დაახლოებით 16:30 საათზე, ქობულეთში, რუსთაველის ქუჩაზე შსს-ს დეტექტივის თანაშემწე-გამომძიებელს, რომელიც სამსახურეობრივ უფლებამოსილებას არ ასრულებდა, ეცვა სამსახურეობრივი მაისური და ჰქონდა ცეცხლსასროლი იარაღი. პროკურატურის განმარტებით, მან ერთ პირს ფიზიკური შეურაცხყოფა მიაყენა, ერთს კი - სიტყვიერი და გაისროლა.

"[დაკავებულმა] აღნიშნული ძალადობრივი ქმედებით, უხეშად დაარღვია საზოგადოებრივი წესრიგი და ძალადობის მუქარით აშკარად გამოხატა უპატივცემულობა შემთხვევის ადგილზე მყოფი სხვა პირების მიმართ", - აღნიშნავენ პროკურატურაში.

საქმეზე გამოძიება "სისხლის სამართლის კოდექსის" 239-ე მუხლის მესამე ნაწილით (ხულიგნობა ჩადენილი ცეცხლსასროლი იარაღის გამოყენებით) მიმდინარეობს. ბრალის დამტკიცების შემთხვევაში, პირს თავისუფლების აღკვეთა ოთხიდან შვიდ წლამდე ვადით ემუქრება.