რესპუბლიკური პარტიაში მიიჩნევენ, რომ საქართველოს პრემიერ-მინისტრმა, გიორგი კვირიკაშვილმა ეჭვქვეშ დააყენა სეკულარიზმი საქართველოში. კვირიკაშვილმა სოფელ სნოში, საპატრიარქოს მიერ ახლადაშენებული სასტუმროს გახსნაზე განაცხადა, რომ „საქართველოში სეკულარობა თავისი კლასიკური გაგებით უადგილოა“.

"საქართველო სეკულარული სახელმწიფოა, რაც ნიშნავს, რომ ეკლესია და სახელმწიფო ერთმანეთისგან ინსტიტუციურად გამიჯნულია. ვის რა რელიგიური მრწამსი აქვს, ეს თითოეული ადამიანის პირადი საქმეა, მაგრამ სახელმწიფოს უფლებამოსილებაა ყველა მისი მოქალაქის თანასწორობის უზრუნველყოფა, განურჩევლად მისი რელიგიური მრწამსისა. ესაა სეკულარობის პრინციპი და არანაირი სხვა, კლასიკური თუ არაკლასიკური სეკულარობა არ არსებობს",- განაცხადა რესპუბლიკური პარტიის თავმჯდომარემ, ხათუნა სამნიძემ და დასძინა, რომ სეკულარული სახელმწიფო მოქალაქეების არჩევანია და პრემიერ-მინისტრს უფლება არ აქვს ეჭქვეშ დააყენოს ეს საკითხი.

სამნიძემ საქართველოს კონსტიტუციაში არსებული ჩანაწერი გაიხსენა, რომლის მიხედვითაც, ეკლესია დამოუკიდებელია სახელმწიფოსგან და "ხარჯის გაღება სახელმწიფოს ხაზინიდან და ადგილობრივ თვითმმართველობათა თანხიდან სარწმუნოებრივ საქმეთა საჭიროებისთვის აკრძალულია." მისი თქმით, მის პარტიას არაერთხელ აღუნიშნავს, რომ ყველა ხელისუფლების პირობებში სახელმწიფოსა და ეკლესიას შორის ურთიერთობის მახინჯი პრაქტიკა ჩამოყალიბდა.

"ეს ყველაფერი დიდი ხანია გასცდა ეკლესიასა და სახელმწიფოს შორის არსებულ საკონსტიტუციო შეთანხმების ჩარჩოებს. ეს პრაქტიკა სულ უფრო მახინჯ ფორმებს იღებს და ამას უკვე ქვეყნის პირველი პირი ღიად აცხადებს - რაც პრაქტიკაში ხორციელდება, იმას იდეოლოგიურადაც ამყარებს", - თქვა სამნიძემ.

რესპუბლიკური პარტიის თავმჯდომარემ, რომელიც ამავდროულად თბილისის საკრებულოს დეპუტატიცაა ამავე უწყებიდან 2017 წლის იანვრიდან საქართველოს საპატრიარქოსთვის სიმბოლურ ფასად გადაცემული მიწის ნაკვეთი (16 590 მ2) გაიხსენა. გარდა ამისა, სამნიძემ ადამიანის უფლებათა და სწავლების ცენტრის მიერ ჩატარებული კვლევის მონაცემები კიდევ ერთხელ გაასაჯაროვა, რომლის მიხედვითაც 2015 წელს საპატრიარქოს საკუთრებაში ჯამში 16 742 988 მ2 მიწა დაფიქსირდა.