რა ხდება: პრეზიდენტის მიერ შეწყალებულმა ლაზარე გრიგორიადისმა ციხე სულ რამდენიმე წუთის წინ დატოვა.

  • მან მედიასთან თქვა, რომ დღეს, საღამოს, რუსული კანონის საპროტესტო აქციას შეუერთდება.

დეტალები: ის მადლობას უხდის პრეზიდენტს და ამბობს, რომ სალომე ზურაბიშვილის განცხადება მისი შეწყალების შესახებ პირდაპირი ეთერით მოისმინა.

  • "შოკში ვიყავი, ერთადერთი გავიგე, მე ის შევიწყალეო, სხვა აღარაფერი მახსოვს", — თქვა მან.
  • ასევე, ლაზარე მადლობას უხდის მის მხარდამჭერებს და ამბობს, რომ მადლიერების გამოსახატავად "სიტყვების პოვნა უჭირს".
  • რაც შეეხება გასული წლის აქციებს, პატიმრობის 1 წლის მიუხედავად, ამბობს, რომ საპროტესტო აქციებში მონაწილეობა ერთხელაც არ უნანია.
  • სასამართლოს მიერ გამოტანილ განაჩენს პოლიტიკურ გადაწყვეტილებად მიიჩნევს.

როგორი იყო ერთი წელი ციხეში: გრიგორიადისის თქმით, ადმინისტრაცია მას "ნორმალურად ეპყრობოდა", თუმცა, აღნიშნავს, რომ ციხეში ბევრი პრობლემაა და ამაზე ვრცლად სხვა დროს ისაუბრებს.

  • ყველაზე მეტად კი მუსიკის გარეშე ყოფნა გაუჭირდა.

რას ამბობს რუსულ კანონზე და პროტესტზე: ლაზარე მიიჩნევს, რომ ეს კანონი ევროკავშირის გზაზე მიმავალი საქართველოს დემოკრატიას ძირს უთხრის.

  • ფიქრობს, რომ შეუძლებელია, ხელისუფლებამ ამ კანონის დამტკიცება შეძლოს.
  • "ბრძოლა გრძელდება, ახლა აქციებია და აქციებზე შევხვდებით", — თქვა ლაზარე გრიგორიადისმა.