მოკლედ: საქართველოს წიგნის გამომცემელთა და გამავრცელებელთა ასოციაცია (GPBA) რუსული კანონის საპროტესტო აქციებს ეხმიანება და ხელისუფლებას მოუწოდებს, რუსული კანონის განხილვისას, ევროინტეგრაციის გაცხადებულ კურსს და საერთაშორისო ვალდებულებებს დაეყრდნოს.

სტრიქონებს შორის: საქართველოში რეგისტრირებულ წიგნის გამომცემელთა დაახლოებით 80% GPBA-ის წევრია. მათ შორის არიან ბიბლუსი, დიოგენე, ინტელექტი და არტანუჯი.

დეტალები: ასოციაცია წერს, რომ დაუშვებელია საქართველოში მივიღოთ კანონი, რომლის უკან გაწვევისკენ მოგვიწოდებენ თავისუფალი, ცივილიზებული სამყაროს წევრი ქვეყნები და დემოკრატიული საერთაშორისო ორგანიზაციები, ვისაც "საქართველოს მოსახლეობის უდიდესი უმრავლესობა თავის მომავალს უკავშირებს":

  • "მოვითხოვთ, რომ მთავრობამ ზედმიწევნით დაიცვას გამოხატვის თავისუფლება და უზრუნველყოს დემონსტრანტების უსაფრთხოება. შექმნილ დაძაბულ ვითარებაში, როცა დედაქალაქის მთავარ გამზირზე ყოველდღიურად იკრიბება ათიათასობით ადამიანი, არ უნდა დავუშვათ სიტუაციის ესკალაცია".
  • ასოციაცია წერს, რომ წარსულის გამოცდილების გათვალისწინებით, უნდა გვახსოვდეს, რომ საზოგადოების კონსოლიდაცია რუსეთის დამპყრობლურ პოლიტიკასთან ეფექტიანი ბრძოლის აუცილებელი პირობაა.

კონტექსტი: ბოლო რამდენიმე დღეა, რაც საქართველოში ხალხი რუსული კანონის მიღებას აპროტესტებს საკანონმდებლო ინიციატივის საპარლამენტო განხილვების პარალელურად.

  • აქციები არა მხოლოდ თბილისში, სხვა რეგიონებშიც იმართება.

დღეს, 20 აპრილს, 17:00 საათზე, პირველი რესპუბლიკის მოედანზე, გაიმართება ქალების მარში, სახელწოდებით — ქალები ვირჩევთ ევროპას!

  • ქალთა მარშის მთავარი მოთხოვნაა, რომ საქართველოს პარლამენტმა უკან გაიწვიოს რუსული კანონი, რომელიც 17 აპრილს პირველი მოსმენით მიიღო.

რედაქციისგან: რატომ არის ქართული ოცნების კანონი რუსული — მოკლედ და მარტივად