მოკლედ: საგარეო საქმეთა სამინისტროში უარყოფენ ინფორმაციას, რომ საქართველოს ელჩი გერმანიაში, ლევან იზორია, ქართული ოცნების რუსული კანონპროექტის გამო ბუნდესტაგში დაიბარეს.

რა უთხრეს On.ge-ს სამინისტროში: "გავრცელებული ინფორმაცია ელჩის დაბარების შესახებ სიმართლეს არ შეესაბამება.

  • ელჩი, კომპეტენციის ფარგლებში, რეგულარულად მართავს შეხვედრებს გერმანულ მხარესთან, მათ შორის ბუნდესტაგში, ორმხრივი თანამშრომლობის სხვადასხვა თემაზე. დაინტერესების შემთხვევაში ასევე უზიარებს გერმანულ მხარეს ინფორმაციას მიმდინარე აქტუალურ საკითხებზე", — თქვეს საგარეო უწყებაში.

კონტექსტი: რეალპოლიტიკა, საკუთარ წყაროზე დაყრდნობით წერს, რომ საქართველოს ელჩი გერმანიაში, ბუნდესტაგის საგარეო კომიტეტში, ქართული ოცნების მიერ პირველი მოსმენით მიღებული ე.წ. უცხოეთის აგენტების კანონის შესახებ სასაუბროდ დაიბარეს.

  • მათი ცნობით, შეხვედრა დახურულ ფორმატში გაიმართება და მთავარი თემა ბოლო კვირებში საქართველოში განვითარებული მოვლენები იქნება.

ბოლო ხაზი: 83 ხმით 0-ის წინააღმდეგ, ქართულმა ოცნებამ რუსული კანონი პირველი მოსმენით მიიღო გუშინ, 17 აპრილს.

ამას მოჰყვა მასშტაბური სახალხო პროტესტი თბილისში, ჯერ საქართველოს პარლამენტის წინ, შემდეგ — მთავრობის ადმინისტრაციის შენობასთან. ხალხი რუსული კანონის მიღებას აპროტესტებს საქართველოს დიდ ქალაქებშიც.

კანონპროექტს ევროკავშირის კანონმდებლობასთან შეუთავსებლად აფასებენ ევროპელი და ამერიკელი ლიდერები, მათ შორის — გერმანიის კანცლერი, ოლაფ შოლცი.

გაიგე მეტი: შოლცი კობახიძეს — დიდი იმედი გვაქვს, რომ ამ კანონს არ მიიღებთ