ლეგენდარული The Beatles-ის წევრების, ჯონ ლენონისა და პოლ მაკარტნის, შვილები ახალი სიმღერის შესაქმნელად გაერთიანდნენ. ახლახან ჯეიმს მაკარტნიმ და შონ ონო ლენონმა ფოლკ-როკის ჟანრის სიმღერა, სახელად Primrose Hill, გამოუშვეს.

ჯეიმს მაკარტნიმ, რომელიც Primrose Hill-ს თავად მღერის, ახალი სიმღერის შესახებ ინსტაგრამზე პოსტი გამოაქვეყნა. მომღერლის თქმით, სიმღერის შთაგონება ბავშვობისას შოტლანდიაში გატარებულ მზიან დღეებს უკავშირდება.

"Primrose Hill უკვე აქაა! ძალიან მიხარია, რომ დღეს ჩემს ახალ სიმღერას გიზიარებთ, რომელიც ჩემი კარგი მეგობრის, შონ ონო ლენონის, დაწერილია. ამ სიმღერის გამოშვებით ისეთი შეგრძნება მაქვს, რომ რაღაც ახალი ნამდვილად დავიწყეთ და მოხარული ვარ, რომ თქვენთვის მუსიკის გაზიარებას ვაგრძელებ", — წერს ჯეიმს მაკარტნი ინსტაგრამზე.

ჯეიმს მაკარტნი, რომელიც პოლ და ლინდა მაკარტნების შვილია, 1977 წელს დაიბადა. ჯეიმსს ორი სოლო ალბომი 2013 და 2016 წლებში აქვს გამოშვებული. მუსიკალური კარიერის განმავლობაში, ჯეიმსი მამასთან ერთადაც უკრავდა ისეთი ცნობილი ალბომისთვის, როგორიცაა Flaming Pie.

შონ ონო ლენონი საზოგადოებამ ბავშვობიდანვე გაიცნო, როცა იოკო ონოს ალბომებში გამოჩნდა. შონ ონო ლენონი ბენდ Cibo Matto-ის წევრი გახდა, რომელმაც სადებიუტო ალბომი Into the Sun 1997 წელს გამოუშვა. რაც შეეხება Primrose Hill-ს, შონ ონო ლენონი სიმღერის კომპოზიტორია და ჯეიმს მაკარტნისთან ეს მისი პირველი მუსიკალური თანამშრომლობაა.