კანადელმა ქალმა, დონაჯინ უაილდმა, 58 წლის ასაკში გინესის მსოფლიო რეკორდი დაამყარა ყველაზე ხანგრძლივი სტატიკური გაჩერებით, ეგრეთ წოდებული პლანკით. უაილდი, რომელიც 5 შვილის დედა და 12 შვილიშვილის ბებიაა, 4 საათის, 30 წუთისა და 11 წამის განმავლობაში იყო სტატიკურად გაჩერებული.

სტატიკურად გაჩერებაში რეკორდის დასამყარებლად, პოტენციური რეკორდსმენი ზედაპირს მხოლოდ წინამხრებითა და ტერფებით უნდა ეხებოდეს, სხეული კი სწორ მდგომარეობაში უნდა იყოს გაშეშებული.

უაილდი ამ ვარჯიშით 12 წლის წინ დაინტერესებულა, როცა მაჯა მოიტეხა. ამბობს, მაშინ მივხვდი, რომ სტატიკურად გაჩერებისას კითხვა და სხვა რაღაცების კეთებაც შემეძლოო.

აი, გინესის რეკორდის დამყარებისთვის მოსამზადებლად კი, დონაჯინი ყოველდღიურად 5-6 საათის განმავლობაში, ინტერვალებით ასრულებდა ამ ვარჯიშს. რეკორდის დამყარებისას, მას ახლობლები ეხვივნენ გარშემო და ამხნევებდნენ. ბოლო 30 წუთის განმავლობაში, იგი ცდილობდა, "ესუნთქა, სიმშვიდე შეენარჩუნებინა და არ შერხეულიყო".

"ყველაზე რთული ბოლო საათი იყო. კონცენტრაცია არ უნდა დამეკარგა და ფორმა უნდა შემენარჩუნებინა", — აღნიშნავს უაილდი, — "ჯერ კიდევ ვერ ვიჯერებ, თავი სიზმარში მგონია".

მისი მიღწევის განმეორების ან გაუმჯობესების მსურველებს კი, დონაჯინი ურჩევს, ცდა და ვარჯიში არ შეწყვიტონ. როცა კითხვა ან კომპიუტერთან მუშაობა გიწევთ, ადექით და ეს საქმე იატაკზე გააკეთეთო.