გერმანიის თანამედროვე ხელოვნების მუზეუმის თანამშრომელი სამსახურიდან იმის გამო გაათავისუფლეს, რომ გამოფენაზე თავისი ნახატი ჩამოკიდა. Pinakothek der Moderne-ში მომუშავე 51 წლის კაცმა მუზეუმის კედელი სპეციალურად გახვრიტა, რათა თავისი ნამუშევარი დაეკიდებინა.

ცოტა ხნის წინ მსგავსი შემთხვევა გერმანიის სხვა მუზეუმშიც დაფიქსირდა — გალერეის თანამშრომლებმა ნამუშევრების ჩაწყობისას კედელზე ზედმეტი ნახატი აღმოაჩინეს, რომელიც სავარაუდოდ, ერთ-ერთმა დამთვალიერებელმა დატოვა. მუზეუმის ადმინისტრაციას კარგი რეაქცია ჰქონდა და არტისტის გაცნობაც კი მოინდომა, შემდეგ კი მას ნახატის აუქციონზე გატანაშიც დაეხმარა. სავარაუდოდ, Pinakothek der Moderne-ის თანამშრომელიც ფიქრობდა, რომ ეს სარისკო ნაბიჯი სამხატვრო კარიერის შექმნაში ხელს შეუწყობდა.

გერმანიის თანამედროვე ხელოვნების მუზეუმის ადმინისტრაციის თქმით, ზედმეტი ნამუშევარი მალევე შეამჩნიეს, ჩამოხსნეს და მფლობელს დაუბრუნეს, თუმცა თანამშრომელი სამსახურიდან გაშვებას ვერ ასცდა, ასევე, მას გალერეაში შესვლაც აეკრძალა.

მუზეუმი Pinakothek der Moderne ისეთი ცნობილი მხატვრების ნამუშევრებს აერთიანებს, როგორებიც არიან: პაბლო პიკასო, სალვადორ დალი, ენდი უორჰოლი და სხვები.