მსახიობ რობერტ პატინსონსა და მომღერალ სუკი უოთერჰაუზს პირველი შვილი შეეძინათ. ამის შესახებ გულშემატკივრებს სუკიმ ინსტაგრამის მეშვეობით აცნობა და ახალშობილთან ერთად ფოტო გამოაქვეყნა.

"კეთილი იყოს შენი მობრძანება, ანგელოზო", — წერს სუკი.

ის, რომ წყვილი შვილს ელოდებოდა, ნოემბერში გავიგეთ. ამის შესახებ საზოგადოებას სუკიმ Corona Capital-ის ფესტივალზე შეატყობინა. უოთერჰაუზი ფესტივალზე ერთ-ერთი შემსრულებელი იყო, რა დროსაც სცენიდან ორსულობაზე იხუმრა.

"დღეისთვის განსაკუთრებულად ბრჭყვიალა ტანსაცმელი ავარჩიე, რადგან მინდოდა თქვენი ყურადღება სხვა რამეზე გადამეტანა", — აღნიშნა მომღერალმა და დამსწრეებს მუცელზე ანიშნა.

პატინსონი და უოთერჰაუზი ერთად უკვე 5 წელზე მეტია არიან. ისინი ერთმანეთს 2018 წლის ზაფხულიდან ხვდებიან. წყვილმა ერთად ცხოვრება პანდემიის პერიოდში ლონდონში დაიწყო, როდესაც პატინსონი ინგლისში გადაღებების გამო იყო.

ურთიერთობის შესახებ სუკიმ თებერვალში მიცემულ ინტერვიუში ისაუბრა და თქვა, რომ გადაღებებისა თუ კონცერტების გამო ორივეს დატვირთული გრაფიკი აქვს, თუმცა წყვილი ერთმანეთის ნახვის გარეშე 2 თვეზე მეტხანს არასოდეს ატარებს.

"მიკვირს, რომ უკვე 5 წელია ასეთი ბედნიერი ვარ. ცოტა ხნის წინ 2 დღით ვისვენებდი და დაუფიქრებლად რობერტის სანახავად გამგზავრება გადავწყვიტე", — ამბობს ის.