მსოფლიოს უმდიდრესი ადამიანების ჩამონათვალში, რომელსაც გავლენიანი გამოცემა Forbes ყოველწლიურად აქვეყნებს, პოპვარსკვლავი ტეილორ სვიფტი პირველად გამოჩნდა. ფორბსის მილიარდერთა სიაში მითითებულია, რომ ამერიკელი მუსიკოსი $1,1 მილიარდს ფლობს.

სიაში ასევე პირველად გამოჩნდა ხელოვნური ინტელექტის პლატფორმა ChatGPT-ის შემქმნელი სემ ალტმანი, რომელიც $1 მილიარდის მფლობელია. რეიტინგის სათავეში კი კვლავაც ფრანგი ბიზნესმაგნატი ბერნარ არნო და მისი ოჯახია, რომელიც $233 მილიარდს ფლობს.

ხოლო ფორბსის მილიარდერთა წლევანდელი ათეული აი, ასე გამოიყურება:

  1. ბერნარ არნო და მისი ოჯახი — $233 მილიარდი
  2. ილონ მასკი — 195 მილიარდი
  3. ჯეფ ბეზოსი — 194 მილიარდი
  4. მარკ ზაკერბერგი — 177 მილიარდი
  5. ლარი ელისონი — 141 მილიარდი
  6. უორენ ბაფეტი — 133 მილიარდი
  7. ბილ გეიტსი — 128 მილიარდი
  8. სტივ ბალმერი — 121 მილიარდი
  9. მუკეშ ამბანი — 116 მილიარდი
  10. ლარი პეიჯი — 114 მილიარდი

ფორბსი ასევე წერს, რომ 2024 წელს მილიარდერების რაოდენობა რეკორდულია — 2 781. რიცხვი 141-ით აჭარბებს შარშანდელ მონაცემს. ამასთან, რეკორდულია სიის წევრების სიმდიდრე, რომელიც ჯამურად $14,2 ტრილიონს შეადგენს.

რაც შეეხება ტეილორ სვიფტს, მისი გამოჩენა ამ ჩამონათვალში არავის გაჰკვირვებია. პოპვარსკვლავის მილიარდერობაზე ჯერ კიდევ შარშან ოქტომბერში შევიტყვეთ Bloomberg-ისგან.

ფოტო: Ethan Miller / TAS23 / Getty Images

გასული 2023 წელი სვიფტისთვის ნამდვილად კარიერის პიკი აღმოჩნდა: გამოუშვა ორი განახლებული ალბომი, წამოიწყო უპრეცედენტო მასშტაბის საკონცერტო ტურნე და რეკორდი რეკორდზე მოხსნა. უფრო ზუსტად, სვიფტი Spotify-ზე პირველი ქალი მუსიკოსი გახდა ყოველთვიური 100 მილიონი მსმენელით. ამასთან, შემსრულებლის რიგით მეექვსე ტურნე, The Eras Tour, ისტორიაში პირველი საგასტროლო ტური გახდა, რომლის შემოსავალმა $1 მილიარდს გადააჭარბა. გაუგონარი კომერციული წარმატება ხვდა წილად ტურნეზე გადაღებულ დოკუმენტურ ფილმსაც, რომლის შემოსავალმა $260 მილიონზე მეტი შეადგინა.

ტეილორ სვიფტის გავლენა ახლა იმდენად დიდია, რომ ევროკომისიამ პოპმუსიკოსს ახალგაზრდების საარჩევნოდ მობილიზებაში დახმარებაც სთხოვა. მედიები იმაზე ალაპარაკდნენ, რომ მუსიკოსს 2024 წლის აშშ-ის საპრეზიდენტო არჩევნებზეც შეუძლია გავლენის მოხდენა.