რა ხდება: გუშინ, 31 მარტს, დასავლეთიდან თბილისისკენ მიმავალ გზაზე მოძრაობა რამდენიმე საათით პარალიზებული იყო. როგორც საქართველოს საავტომობილო გზების დეპარტამენტი სპეციალურ განცხადებაში განმარტავს, თბილისი-სენაკი-ლესელიძის თბილისისკენ მომავალ გზაზე საცობი გამოიწვია საავტომობილო გზის 26-ე კილომეტრზე, მდინარე არაგვის ხიდზე, მარცხენა მიმართულებით დაზიანებული კონსტრუქციული ნაწილის აღდგენითმა სამუშაოებმა.

  • უწყების თანახმად, სამუშაოებს მიმდინარე კვირაში დაასრულებენ და მოძრაობა, ორივე ზოლზე, მომდევნო კვირაში გაიხსნება; მოსალოდნელ შეფერხებასთან დაკავშირებით კი, მოსახლეობას წინასწარ აცნობეს.

განცხადებიდან: "მიმდინარე წლის 21 მარტს, საქართველოს საავტომობილო გზების დეპარტამენტმა გაავრცელა განცხადება, სადაც მოსახლეობას მიაწოდა ინფორმაცია, რომ მდინარე არაგვის ხიდზე (მარცხენა მიმართულება), დაზიანდა კონსტრუქციული ნაწილი და საჭიროებდა აღდგენას, ხოლო სამუშაოებიდან გამომდინარე აღნიშნულ მონაკვეთზე საორიენტაციოდ ერთ სამოძრაო ზოლზე, დასავლეთ-აღმოსავლეთის მიმართულებაზე, მოძრაობა შეიზღუდებოდა."

უწყება უარყოფს გავრცელებული ინფორმაციას იმის შესახებ, რომლის თანახმად, სამუშაოები მიტოვებულია, ან აღნიშნული სამუშაოების შესრულება დროის მცირე პერიოდში იყო შესაძლებელი.

  • "გუშინ, ობიექტზე არ იმყოფებოდა მუშა პერსონალი, რადგან მიმდინარეობს ბეტონის შესაბამისი სიმტკიცის მიღების პროცესი, რის შემდეგაც ხიდის სავალ ნაწილზე დაიგება ასფალტ-ბეტონის საფარი და შეზღუდულ ზოლზე მოძრაობა გაიხსნება", — აცხადებს საავტომობილო გზების დეპარტამენტი.

ბოლო ხაზი: განცხადებაში ასევე, წერია, რომ აღნიშნული ხიდი აშენებულია გასული საუკუნის 70-იან წლებში, ლითონის მალის ნაშენზე დამონტაჟებულია რკინაბეტონის ფილები და მოწყობილია ასფალტ-ბეტონის საფარი. შესაბამისად, პერიოდულად ზიანდება ფილა, რაც შემდგომ საჭიროებს რკინაბეტონის სავალი ნაწილის ფილების დაზიანებული ფრაგმენტების დაშლას, ქარგილის მოწყობას, დაზიანებული ფილების კონსტრუქციების არმატურით გაძლიერებას და მაღალი სიმტკიცის ბეტონით შევსებას.