რა ხდება: რუსეთის პრეზიდენტმა ვლადიმერ პუტინმა, ხელი მოაწერა განკარგულებას რუსეთის მოქალაქეების საგაზაფხულო გაწვევის შესახებ.

  • განკარგულებაში წერია, რომ სამხედრო სამსახურში 150 ათასი ადამიანი წავა.
  • შესაბამისი ბრძანება კრემლის პროპაგანდისტულმა ტასმა ტელეგრაზე გამოაქვეყნა.
რუსეთის პრეზიდენტის ბრძანება სამხედრო გაწვევის შესახებ

რუსეთის პრეზიდენტის ბრძანება სამხედრო გაწვევის შესახებ

ფოტო: TACC

ფოტო: TACC

დეტალები: ახალი წესით, რომელიც 2024 წლის 1-ელი იანვრიდან ამოქმედდა, სამხედრო სამსახურში გაწვევას დაექვემდებარებიან 18-დან 30 წლამდე ასაკის მოქალაქეები, მათ გარდა, ვისაც 2023 წლის ბოლომდე შეუსრულდა 27 წელი.

  • ანდრეი კარტაპოლოვმა, რომელიც სახელმწიფო სათათბიროს თავდაცვის კომიტეტის ხელმძღვანელია, მანამდე განაცხადა, რომ "ის მოქალაქეც, რომელიც 2023 წელს, 31 დეკემბერს, 23:59 საათზეც კი გახდა 27 წლის, ექვემდებარება სამხედრო რეზერვს და არ ექვემდებარება გაწვევას; ხოლო ისინი, ვინც ახლა 28, 29 წლის არიან, უკვე რეზერვში არიან", — თქვა მან.

წინაისტორია: 2023 წელს, რუსეთის თავდაცვის მინისტრის, სერგეი შოიგუს წინადადებით, რუსეთში გაწვევის ასაკობრივი ზღვარი შეიცვალა.

  • სამხედრო რეფორმის ფარგლებში, სახელმწიფო დუმამ ასევე დააკანონა ელექტრონული გამოძახებები და აუკრძალა "საჯარო სამსახურში გაწვევას დაქვემდებარებულ მოქალაქეებს" რუსეთის დატოვება, მოწვევის მიღების მომენტიდან — სამხედრო აღრიცხვასა და გამოცხადებამდე.

ბოლო ხაზი: როგორც დამოუკიდებელი რუსული გამოცემის, ვერსტკას წყაროები აცხადებენ, რუსეთის თავდაცვის სამინისტრო ომში კიდევ 300 ათასი ადამიანის გაგზავნას აპირებს და ამიტომ, მოსალოდნელია ახალი მობილიზაცია.

არქივიდან:

2022 წლის 21 სექტემბერს პუტინმა რუსეთში მობილიზაცია გამოაცხადა.

  • ამის გამო, რუსეთის მოქალაქეები ქვეყნიდან გარბოდნენ — საზღვრებთან, მათ შორის, საქართველოში, რამდენიმეკილომეტრიანი რიგები იყო და ათასობით რუსი შემოდიოდა.

ფოტო: ნიკოლაი ლევიში / ტელეგრამი

ფოტო: ნიკოლაი ლევიში / ტელეგრამი

  • სამოქალაქო საზოგადოება და ოპოზიცია რუსების უკონტროლო შემოდინებაში საფრთხეს ხედავდა და საზღვრის ჩაკეტვას მოითხოვდა.

იმ დროისათვის, მობილიზაციის გამოცხადების შემდეგ, საქართველოში რუსეთიდან საზღვრის კვეთის მაჩვენებელმა, წინა დღეებთან შედარებით, 40-45%-ით მოიმატა.