მოკლედ: პრეზიდენტის საპარლამენტო მდივანი გიორგი მსხილაძე საარჩევნო კოდექსში მიღებული ცვლილებების შესახებ, პრეზიდენტ სალომე ზურაბიშვილის რიგით მეხუთე ვეტოს გამოეხმაურა და აღნიშნა, რომ "ამ რიცხვს ვერ გამოტოვებდა, ისევე როგორც ბატონი ანრი [ოხანაშვილი] ვერ გამოტოვებდა მეხუთე სართულს, რომელზეც, ალბათ, ცხოვრობს".

  • ამის შესახებ გიორგი მსხილაძემ დღეს, 19 მარტს, პარლამენტში პლენარულ სხდომაზე განაცხადა.

კონტექსტი: 18 მარტს, საქართველოს პარლამენტის იურიდიულ საკითხთა კომიტეტმა, საარჩევნო კოდექსში მიღებული ცვლილებების შესახებ, პრეზიდენტის სალომე ზურაბიშვილს მოტივირებულ შენიშვნებს მხარი არ დაუჭირა. პრეზიდენტის ვეტოს განხილვის შემდეგ კი ანრი ოხანაშვილმა, იურიდიულ საკითხთა კომიტეტის თავმჯდომარემ განაცხადა, რომ

  • "ეს არის მე-5 ვეტო, რაც პრეზიდენტმა გამოიყენა. ეს მეხუთე რას ნიშნავს და ვისთან ასოცირდება, ჩვენმა საზოგადოებამ ძალიან კარგად იცის".

გუშინვე, საქართველოს პრეზიდენტმა, სალომე ზურაბიშვილმა მადლობა გადაუხადა ყველას, ვინც 18 მარტს მას დაბადების დღე მიულოცა და აღნიშნა, რომ "ძალიან ბედნიერია" იმით, რომ დაიბადა 18 მარტს და არა 5 მარტს:

  • "თორემ ვიღაც-ვიღაცები კიდევ რაღაცას დამაბრალებდნენ, ალბათ",— თქვა ზურაბიშვილმა.