მოკლედ: საერთაშორისო გამჭვირვალობა — საქართველოს (TI) ინფორმაციით, აჭარაში, მაღალჩინოსან ძმებ ბერიძეებთან დაკავშირებულმა კომპანიამ ესია ჯგუფმა, 2021-2024 წლებში სახელმწიფო შესყიდვებიდან 5 344 077 ლარი მიიღო.

TI-მ ძმებ ბერიძეებზე პირველი კვლევა 2023 წლის ივნისში გამოაქვეყნა, ამ დროს ესია ჯგუფს სახელმწიფო შესყიდვებიდან 1 900 000-მდე ლარის შემოსავალი ჰქონდა მიღებული.

  • ესია ჯგუფმა, როგორც ქვეკონტრაქტორმა კომპანიამ, 1 716 998 ლარის სამუშაოები შეასრულა შუახევის სტადიონის მშენებლობისას, რასაც წინა კვლევის დროს, TI-ის საჯარო უწყებები არ უდასტურებდნენ.
  • ბოლო 8 თვეში კომპანიამ ტენდერებიდან და სახელმწიფო შესყიდვებიდან 1 757 332 ლარი მიიღო.

რა კავშირია ესია ჯგუფსა და ძმებ ბერიძეებს შორის?

ვინ არის აკაკი ბერიძე: აკაკი ბერიძე ბათუმის ყველაზე მაღალბიუჯეტიანი მუნიციპალური იურიდიული პირის, საქალაქო ინფრასტრუქტურისა და კეთილმოწყობის სამმართველოს ხელმძღვანელია. მანამდე ის შპს რბ — ახალი გზის 33% მფლობელი და დირექტორი იყო. მასთან ერთად, კომპანიის მეწილეები იყვნენ ირაკლი აზნაურიშვილი (34%) და ვალერი ადონია (33%)

  • 2017 წელს აკაკი ბერიძე დირექტორობიდან გადადგა, საკუთარი წილი 100 ლარად გაყიდა, რის შემდეგაც ინჟინრად მუშაობდა კომპანია ანაგში და აჭარის მთავრობის კუთვნილ შპს აჭარის ნარჩენების მართვის კომპანიაში.
  • აკაკი ბერიძე 2021 წელს ბათუმის საქალაქო ინფრასტრუქტურისა და კეთილმოწყობის სამმართველოში ჯერ დირექტორის მოადგილედ, დეკემბრიდან კი დირექტორად დაინიშნა.

ესია ჯგუფის დაფუძნება: ესია ჯგუფი 2018 წლის ივნისში აკაკი ბერიძის ყოფილმა ბიზნესპარტნიორმა, ირაკლი აზნაურიშვილმა დააფუძნა. შპს ესია ჯგუფი და შპს რბ-ახალი გზა ერთი და იგივე მისამართზე, ბათუმში, ტბელ აბუსერიძის ქუჩა #21 ბ.4-შია რეგისტრირებული.

როლანდ და რაულ ბერიძეები: ესია ჯგუფმა სახელმწიფო შესყიდვებში 2021 წლის ზაფხულიდან მონაწილეობს. მაშინ როლანდ ბერიძე, აკაკი ბერიძის ძმა, ქედის მუნიციპალიტეტის მერის პირველი მოადგილე იყო.

  • კომპანიამ ქვეკონტრაქტორების პირველი ხელშეკრულება 2021 წლის ივლისში მიიღო.
  • 2021 წლის არჩევნების შედეგებით, როლანდ ბერიძე ქედის მუნიციპალიტეტის მერი გახდა.
  • რაულ ბერიძე, მესამე ძმა, 2017 წლიდან დღემდე, აჭარის საავტომობილო გზების დეპარტამენტის უფროსის პირველი მოადგილეა.

"ესია ჯგუფის ქვეკონტრაქტორობა სწორედ ამ სამი სახელმწიფო შემსყიდველი ორგანიზაციის — ქედის მუნიციპალიტეტის მერიის, აჭარის საავტომობილო გზების დეპარტამენტისა და ბათუმის საქალაქო ინფრასტრუქტურისა და კეთილმოწყობის სამმართველოს შესყიდვებში დაფიქსირდა", — წერს TI.

ბოლო 8 თვის შემოსავალი სახელმწიფო შესყიდვებიდან

TI-ის მიხედვით, წინა პერიოდის მსგავსად, ქედის მუნიციპალიტეტის მერიამ და ბათუმის მუნიციპალურმა სამმართველომ ესია ჯგუფთან საქმიანი ურთიერთობა გააგრძელეს. გარდა ამისა, კომპანიასთან მსხვილი შესყიდვის ხელშეკრულება გააფორმა აჭარის ნარჩენების მართვის კომპანიამ, სადაც აკაკი ბერიძე წლების განმავლობაში მუშაობდა.

  • ჯამში, კომპანიამ 5 შესყიდვიდან 1 757 332 ლარი მიიღო, 3 შემთხვევაში ხელშეკრულება ქედის მერიამ გაუფორმა, თითო-თითო ხელშეკრულებები მიიღო აჭარის ნარჩენების მართვის კომპანიიდან და ბათუმის საქალაქო ინფრასტრუქტურისა და კეთილმოწყობის სამმართველოდან.
  • "თანხის 54% (955 808 ლარი) უკონკურენტო და კონკურენტების დისკვალიფიკაციის ხარჯზე მოგებული ტენდერებიდანაა მიღებული", — წერს TI.

მონაწილეობა შუახევის სტადიონის მშენებლობაში

საერთაშორისო გამჭვირვალობა — საქართველო აღნიშნავს, რომ ძმებ ბერიძეებზე წინა კვლევის მომზადების დროს, აჭარის მთავრობის კუთვნილმა შპს-მ აჭარის პროექტების მართვის კომპანიამ მათ არ მიაწოდა ინფორმაცია იყო თუ არა ესია ჯგუფი ქვეკონტრაქტორი შუახევის სტადიონის მშენებლობის პროცესში, რომელშიც კომპანია გლობალ სტანდარტმშენმა უკონკურენტოდ გაიმარჯვა.

  • "ტენდერში ესია ჯგუფის ქვეკონტრაქტორობაზე საფუძვლიანი ეჭვი კომპანიის ფეისბუქ გვერდის შესწავლისას გაჩნდა", — წერს TI — " მაშინ აჭარის პროექტების მართვის კომპანიაში თქვეს, რომ მიმწოდებელ ორგანიზაციას ქვეკონტრაქტორის არსებობის შესახებ ინფორმაცია არ მოუწოდებია, რაც ცხადია, მიუთითებს ხელშეკრულებით ნაკისრი ვალდებულებების არაჯეროვან კონტროლზე, რაც კორუფციის დამატებით რისკებს აჩენს".

TI-ის შეფასებით, გაუგებარია, რატომ არ ჰქონდა ინფორმაცია აჭარის მთავრობის კუთვნილ შპს-ს, როგორც შემსყიდველ ორგანიზაციას ქვეკონტრაქტორის არსებობის შესახებ, მით უმეტეს იმ პირობებში, როცა სამუშაოების თითქმის 90% სწორედ ამ ქვეკონტრაქტორმა შეასრულა, "ორივე გარემოება კითხვებს აჩენს კორუფციის რისკებთან დაკავშირებით".

საბოლოო ჯამში,

  • ძმებ ბერიძეებთან დაკავშირებულმა კომპანიამ 2021-2024 წლებში ქედის მუნიციპალიტეტის, აჭარის მთავრობის კუთვნილი პროექტებისა და ნარჩენების მართვის კომპანიების, ბათუმის საქალაქო ინფრასტრუქტურის და კეთილმოწყობის სამმართველოს შესყიდვებიდან 5,344,077 ლარი მიიღო.
  • მათ შორის 3 568 745 ლარი — ქვეკონტრაქტორებიდან, 955 808 ლარი კი — უკონკურენტო და კონკურენტების დისკვალიფიკაციის ხარჯზე მოგებული ტენდერებიდან.

ბოლო ხაზი: საერთაშორისო გამჭვირვალობა — საქართველო სახელმწიფო უსაფრთხოების სამსახურის ანტიკორუფციულ სააგენტოს მოუწოდებს, მოკვლეული ინფორმაციის საფუძველზე, დაიწყოს გამოძიება აღწერილ სახელმწიფო შესყიდვებში სავარაუდო კორუფციის გამოსავლენად.

ასევე, ნახეთ: ეფექტიანია თუ არა ანტიკორუფციული ბიურო მოსამართლეების კეთილსინდისიერების შეფასებისას