მოკლედ: საქართველოს საგარეო საქმეთა მინისტრი ილია დარჩიაშვილი უარყოფს, რომ მექსიკის საზღვართან ქართველები გაიტაცეს და მედიას მოუწოდებს, "სიცრუის ტირაჟირებისგან თავი შეიკავოს".

  • "ცალკეული ტელევიზიები საუბრობენ, რომ ქართველები არიან გატაცებულები. თქვენ გარდა ქართველების გატაცებაზე არავინ საუბრობს. ნუ შეგყავთ ჩვენი მოქალაქეები, ჩვენი მაყურებლები შეცდომაში. გეყოთ იმის ძალა და უნარი, რომ როდესაც არასწორ და უსაფუძვლო ინფორმაციას გაავრცელებთ, გამოხვიდეთ და თქვათ — ეს იყო დაუზუსტებელი ინფორმაცია", — განაცხადა ილია დარჩიაშვილმა დღეს, 18 მარტს, მედიასთან.

დეტალები: დარჩიაშვილის თქმით, მექსიკის საზღვართან არავინ არ გაუტაცებიათ და "თუკი ნებისმიერი ადამიანს, ეს იქნება მექსიკა თუ ნებისმიერი სხვა ქვეყანა, დასჭირდება თითოეული ჩვენი [საქართველოს] დიპლომატის დახმარება, ჩვენ ამისთვის მზად ვართ და გავაგრძელებთ მომავალშიც".

კონტექსტი: 16 მარტს, ფორმულამ გაავრცელა ინფორმაცია, რომ ქართველები, რომლებიც აშშ-ში შესვლას არალეგალურად გეგმავდნენ, კრიმინალური ჯგუფის ხელში აღმოჩნდნენ.

  • "არსებული ინფორმაციით, მექსიკურ ნარკოკარტელს 30-მდე ქართველი მძევლად ჰყავს აყვანილი", — აცხადებს ტელეარხი.
  • ფორმულა, გატაცებულთა ახლობლის მონათხრობზე დაყრდნობით წერს, რომ ტყვეობაში მყოფებზე ფიზიკურად ძალადობენ და გამოსასყიდს ითხოვენ. მისი თქმით, ფულს ნარკოკარტელი ე.წ. გადამყვანისგან ითხოვს.

ბოლო ხაზი: 16 მარტს, საგარეო უწყებამ On.ge-ს უთხრა, "საელჩო კავშირზეა მექსიკის საიმიგრაციო სამსახურთან დამატებითი ინფორმაციის მიღების მიზნით და არკვევს მოქალაქეთა შესაძლო ადგილსამყოფელს.

  • გუშინ, 17 მარტს კი, საგარეო საქმეთა სამინისტროში On.ge-ს უთხრეს, რომ მექსიკის საზღვართან ქართველების გატაცებაზე ამ დრომდე სიახლე არ აქვთ და არც გატაცებულთა რაოდენობა არის დაზუსტებული.