ამერიკის შეერთებული შტატების სენატორს არიზონადან, ჯონ მაკკეინს, რომელიც ყოველთვის გამოირჩევა საქართველოს მხარდამჭერი პოზიციებით საერთაშორისო დონეზე, ტვინის სიმსივნის უმძიმესი ფორმა, გლიობლასტომა დაუდგინეს. ამერიკული მედიის ინფორმაციით, მაკკეინს საფეთქლის მიმდებარე არედან უკვე ამოუღეს შედედებული სისხლის გროვა და დაზიანებული ქსოვილი, რომელიც სიმსივნითაა გამოწვეული.

ჯონ მაკკეინი გასულ კვირას გეგმიურ შემოწმებაზე მივიდა თავის ექიმთან, ის არ უჩიოდა სიმსივნისთვის დამახასიათებელ რაიმე სიმპტომს, გარდა დაღლილობისა. 80 წლის სენატორმა აღნიშნული თავის გადატვირთულ სამუშაო გრაფიკსა და მოგზაურობას დაუკავშირა, თუმცა სამედიცინო შემოწმებამ ცხადყო, რომ პრობლემა გაცილებით სერიოზულია. როგორც მისმა მკურნალმა ექიმმა თქვა, მაკკეინი მათი რეკომენდაციით, რეგულარულად, ოთხ თვეში ერთხელ იტარებს გამოკვლევებს. როგორც ცნობილია, მას 2000 წელს კანის სიმსივნის დიაგნოზი დაუსვეს, რისგანაც განიკურნა, თუმცა მუდმივად ექიმების მეთვალყურეობის ქვეშაა. სიმსივნის კერა, რომელიც მაკკეინის ტვინში აღმოუჩინეს, საფეთქელთან, სწორედ იმ ადგილთანაა ახლოს, სადაც მას კანზე კიბო ჰქონდა.

ექიმების ინფორმაციით, მაკკეინი სამსაათიანი ოპერაციის შემდეგ თავს კარგად გრძნობს და მისი ფიზიკური ან ფსიქიკური მდგომარეობა არ გაუარესებულა, ის რეაბილიტაციას საკუთარ სახლში გადის, მედპერსონალი კი მკურნალობის მეთოდს არჩევს, რაც გულისხმობს ქიმიო და რადიოთერაპიას.

როგორც CNN-ის სამედიცინო მიმომხილველი, ანჯეი გუფთა აცხადებს, გლიობლასტომა ტვინის სიმსივნის აგრესიული ფორმაა და პაციენტთა მხოლოდ ათი პროცენტი, მკურნალობის შემთხვევაში, ხუთ წლამდე ცოცხლობს. 90 პროცენტის შემთხვევაში კი, დარჩენილი სიცოცხლის სავარაუდო ხანგრძლივობა, მკურნალობის მიუხედავად, 14 თვემდეა.

ჯონ მაკკეინი ვიეტნამის ომის ვეტერანია, რომელიც რამდენიმე წელი ტყვედ იყო ჩავარდნილი. ის არიზონას სენატორია 1987 წლიდან. მაკკეინი 2008 წელს რესპუბლიკელთა სახელით პრეზიდენტობისთვისაც კი იბრძოდა, თუმცა ბარაკ ობამასთან დამარცხდა. სენატორი მაკკეინი გამოირჩევა რუსეთის მიმართ ხისტი მიდგომებით და მიიჩნევს, რომ მასთან ურთიერთობების მეგობრულ დონეზე დალაგება შეუძლებელია. ამის გამო მან პრეზიდენტი ტრამპიც არაერთხელ გააფრთხილა. მაკკეინი არაერთხელ იმყოფებოდა საქართველოში და აშშ-ს საკანონმდებლო ორგანოში მუდმივად ლობირებს საქართველოს ინტერესებს.