მოკლედ: ქართული ოცნების აღმასრულებელმა მდივანმა მამუკა მდინარაძემ ტყუილი უწოდა ინფორმაციას, რომლის მიხედვით ჯანდაცვის მინისტრის პოსტზე ექიმი-კარდიოლოგის, ზვიად ყიფიანის კანდიდატურა განიხილება.

დეტალები: მდინარაძემ აღნიშნა, რომ ეს ინფორმაცია პრემიერ-მინისტრ ირაკლი კობახიძესთანაც კი გადაამოწმა.

  • "ისე კატეგორიულად დადეთ განცხადება, რომ ეჭვი შემეპარა და პრემიერ-მინისტრსაც მივწერე. კატეგორიულად გამოვრიცხავ ამ კანდიდატს. ამასთან დაკავშირებით თქვენი [მთავარი არხის] გახმოვანებული ინფორმაცია არის აბსოლუტურად ტყუილი", — მიმართა მდინარაძემ მთავარი არხის ჟურნალისტს.

კონტექსტი: დღეს, 9 მარტს, მთავარმა არხმა გაავრცელა ინფორმაცია, რომ ჯანდაცვის მინისტრის პოსტზე ზურაბ აზარაშვილს ექიმი-კარდიოლოგი ზვიად ყიფიანი ჩაანაცვლებს. მათივე თქმით, მთავრობის ადმინისტრაციის უფროსის თანამდებობას თბილისის საკრებულოს წევრი, ლევან ჟორჟოლიანი დაიკავებს.

ბოლო ხაზი: საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა, ზურაბ აზარაშვილმა თანამდებობა 1-ელ მარტს დატოვა.

  • იმავე დღეს, ირაკლი კობახიძემ განაცხადა, რომ მის გეგმებში არ შედიოდა ზურაბ აზარაშვილის გადაყენების საკითხი, თუმცა, "დაინახა ხარვეზები", რის მაგალითადაც რესპუბლიკური საავადმყოფოს საკითხი დაასახელა.
  • 4 მარტს აზარაშვილმა ფეისბუქპოსტში დაწერა, რომ გამოვლენილია ფაქტები, როდესაც საქართველოში "საეჭვო ქვეყნიდან" შემოჰქონდათ დაურეგისტრირებელი, საეჭვო წარმომავლობის ათასობით ცალი ონკოლოგიური მედიკამენტი, რომელშიც, მისი თქმით, მინიმუმ 60 ონკოლოგია ჩართული.