მოკლედ: პრემიერ მინისტრის ირაკლი კობახიძის განცხადებით, მის გეგმებში არ შედიოდა ჯანდაცვის მინისტრის, ზურაბ აზარაშვილის გადაყენების საკითხი, თუმცა, "დაინახა ხარვეზები", რის მაგალითადაც რესპუბლიკური საავადმყოფოს საკითხი დაასახელა.

დეტალები: "ვხედავდი პრობლემებს მართვის კომუნიკაციის კუთხით. ამასთან დაკავშირებით იყო უკმაყოფილება სამედიცინო საზოგადოებაში", — თქვა კობახიძემ და აღნიშნა, რომ აზარაშვილის გადაყენება "პრაქტიკულად, დღეს გადაწყვეტილი საკითხია".

კონტექსტი: 2024 წლის 24 იანვარს, მაშინდელმა პრემიერ-მინისტრმა ირაკლი ღარიბაშვილმა მთავრობის სხდომაზე განაცხადა, რომ დაინგრევა რესპუბლიკური საავადმყოფოს შენობა და მის ბაზაზე ახალი საავადმყოფო აშენდება.

  • ღარიბაშვილის ამ განცხადებას საავადმყოფოს თანამშრომლების მხრიდან არაერთი პროტესტი მოჰყვა. ისინი მოითხოვდნენ კლინიკის დემონტაჟის გადაწყვეტილების გაუქმებას.

მსგავსი: რესპუბლიკური საავადმყოფოს ექიმებმა, კლინიკის დემონტაჟის შეწყვეტის მოთხოვნით, მსვლელობა გამართეს

24 თებერვალს, ირაკლი კობახიძემ, რესპუბლიკური საავადმყოფოს მედპერსონალთან შეხვედრის შემდეგ, განაცხადა, რომ რესპუბლიკური საავადმყოფოს რეორგანიზაცია და დემონტაჟის პროცესი შეჩერდება. შენობა არ დაინგრევა იქამდე, სანამ ახალი არ აშენდება.

  • მომავალი 3 წელი საავადმყოფო ფუნქციონირებას არსებულ შენობაში გააგრძელებს, 3 წლისთავზე კი — სამშენებლო სამუშაოები უნდა დასრულდეს და საავადმყოფო ახალ შენობაში გადავა.

გაიგე მეტი: რესპუბლიკურ საავადმყოფოსთან დაკავშირებით ხელისუფლების გეგმა კრიზისს ქმნის — რა გავარკვიეთ მედპერსონალისგან