მოკლედ: გაზეთ ქრონიკა პლუსის რედაქტორი ელისო კილაძე ამბობს, რომ ყაზბეგის გამზირზე, სილამაზის სალონში ყოფნის დროს, მისი და მისი მეგობრის მისამართით "გამაფრთხილებელი გასროლა" მოხდა. ამის შესახებ ის ფეისბუქ-ლაივში საუბრობს.

  • ასევე, წერს, რომ ამ მომენტში გამოკითხვაზე იმყოფება.

რას ამბობს შსს: შინაგან საქმეთა სამინისტრო On.ge-ს უდასტურებს სროლის ფაქტს და აცხადებს, რომ გამოძიება ცეცხლსასროლი იარაღის მართლსაწინააღმდეგო შეძენა, შენახვა-ტარების ფაქტზე დაიწყო, საქართველოს სისხლის სამართლის კოდექსის 236-ე მუხლით.

  • თუმცა, უწყებას ჩვენთან არ დაუდასტურებია მომხდარის კავშირი ჟურნალისტ ელისო კილაძესთან.

დეტალები: "როგორც კი მანქანიდან გადმოვედით მე და ჩემი მეგობარი, მაშინვე ერთი საეჭვო პირი გვერდით ამოგვიდგა, ძალიან ყურადღებით გვაკვირდებოდა ორივეს. მერე გადაჭრა გზა და გადავიდა მეორე მიმართულებით", — ამბობს ელისო კილაძე ფეისბუქ ლაივში.

  • მისი თქმით, სალონში შესვლიდან დაახლოებით 5-10 წუთში, მისი მეგობრის მისამართით, რომელიც მას სალონის გარეთ ელოდებოდა, "გამაფრთხილებელი გასროლა" მოხდა.
  • "მივმართავ ყველას, ნარკომოვაჭრეს, კურიერს, ტელეგრამის არხებში ჩემი მისამართით მუქარების ავტორებს, მინდა იცოდეთ, რომ თქვენი არ მეშინია. ბრძოლა იქნება ბოლომდე, ეს ბრძოლა დასრულდება იმით რომ ყველა ნარკომოვაჭრე იქნება ციხეში", — ამბობს კილაძე.
  • მისივე თქმით, ტყვია გამოძიებას "შეფუთულ მდგომარეობაში" გადასცა.