ამერიკის შეერთებულმა შტატებმა სანქციები დაუწესა სომხეთში მაღაროს ერთ-ერთ უმსხვილეს ოპერატორს, GeoProMining-ს —კომპანიას, რომელიც, გავრცელებული ინფორმაციით, ეკუთვნის რუსულ ოჯახს, რომელსაც მჭიდრო კავშირი აქვს პრეზიდენტ ვლადიმირ პუტინთან.

შეერთებული შტატების სახაზინო დეპარტამენტმა GeoProMining-ი სიაში 23 თებერვალს, უკრაინაში რუსეთის სრულმასშტაბიანი შეჭრიდან მეორე წლისთავზე შეიყვანა.

აშშ-ის სახელმწიფო დეპარტამენტმა განაცხადა, რომ მათი სამიზნე იყო რუსული სამთო კომპანიების ქსელი, რომლებიც დაკავშირებულია მდიდარ რუს ოჯახთან — ტროცენკოებთან. ეს ოჯახი, სავარაუდოდ, რუსეთის პრეზიდენტ ვლადიმერ პუტინთან არის დაახლოებული.

GeoProMining Armenia-ს შვილობილი კომპანია, "ინდუსტრიული კომპანია", ფლობს ზანგეზურის კომბინატის 60%-იან წილებს. კომპანია, ასევე, ფლობს GeoProMining Gold-ს, რომელიც მართავს სოტკის ოქროს მაღაროს, არარატის ოქროს მოპოვების ქარხანას და აგარაკის კომბინატს.

სომხური საგამოძიებო გამოცემა Hetq იტყობინება, რომ გლებ ტროცენკო, რომან ტროცენკოს 23 წლის შვილი GeoProMining Gold-ის და ზანგეზურ-სპილენძ-მოლიბდენის კომბინატის აქციონერი იყო 2023 წლის ოქტომბრამდე.

Hetq-ის გამოძიებამ დაადგინა, რომ გლებ ტროცენკოს წილები გადაეცა სვეტლანა იერშოვას, რუსეთის მოქალაქეს, რომელიც, სავარაუდოდ, კავშირშია ტროცენკოს ოჯახთან. გავრცელებული ინფორმაციით, იერშოვას აქვს კავშირები AEON Mining-თან, ჰოლდინგ კომპანიასთან, რომელიც ეკუთვნის რომან ტროცენკოს.

AEON Mining-ს, GeoProMining-ის მსგავსად, სანქციები დაუწესდა, გლებ ტროცენკო კი სანქცირებულთა სიაში 2023 წლის ნოემბერში მოხვდა.

GeoProMining-ის ვებსაიტის დაარქივებულ გვერდზე, რომელიც თარიღდება 2023 წლის აგვისტოთი, რომან ტროცენკო არის კომპანიის გამგეობის წევრი.

ოთხშაბათს, 28 თებერვალს, ეკონომისტმა სურენ სპარსიანმა განუცხადა OC Media-ს, რომ აშშ-ის სანქციებს, შესაძლოა, არ ჰქონდეს პირდაპირი გავლენა სომხეთში GeoProMining-ის მაღაროების მუშაობაზე.

"რუსალი, ჩვენი ალუმინის ქარხანა, აგრძელებს მუშაობას სანქციების გარეშე. მისი რუსული მშობელი კომპანია სანქციებს ექვემდებარება, სომხური კომპანია კი არა”, — განმარტა მან.

თუმცა, მან თქვა, რომ თუ სანქციები გამოყენებული იქნება GeoProMining-ის შვილობილი კომპანიებისა და მაღაროების მიმართ, მას შეიძლება ჰქონდეს "სერიოზული შედეგები“ სომხეთისთვის.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.