მოკლედ: რესპუბლიკური საავადმყოფოს რეორგანიზაცია და დემონტაჟის პროცესი შეჩერდება. შენობა არ დაინგრევა იქამდე, სანამ ახალი არ აშენდება.

  • ამის შესახებ საქართველოს პრემიერ-მინისტრმა ირაკლი კობახიძემ რესპუბლიკური საავადმყოფოს მედპერსონალთან შეხვედრის შემდეგ, მთავრობის ადმინისტრაციაში გამართულ ბრიფინგზე განაცხადა.

დეტალები: კობახიძის თქმით, სავარაუდოდ, მომავალი 3 წელი საავადმყოფო ფუნქციონირებას არსებულ შენობაში გააგრძელებს, 3 წლისთავზე კი — სამშენებლო სამუშაოები უნდა დასრულდეს და საავადმყოფო ახალ შენობაში გადავა.

  • "ჩვენ ვიმუშავებთ პროექტზე, რომლის მიხედვით კლინიკის უკანა ტერიტორიაზე განხორციელდეს საავადმყოფოს მშენებლობა, ხოლო წინა ტერიტორია გამოყენებული იქნას საინვესტიციო მიზნებისთვის", — განაცხადა ირაკლი კობახიძემ.
  • შეკითხვას, გაუქმდება თუ არა რესპუბლიკური საავადმყოფოს თანამშრომლებისთვის შემუშავებული საკომპენსაციო პაკეტი, კობახიძემ უპასუხა, რომ "ბუნებრივია მომზადდება შესაბამისი სამართლებრივი დოკუმენტაცია".

კონტექსტი: 2024 წლის 24 იანვარს, მაშინდელმა პრემიერ-მინისტრმა ირაკლი ღარიბაშვილმა მთავრობის სხდომაზე განაცხადა, რომ დაინგრევა რესპუბლიკური საავადმყოფოს შენობა და მის ბაზაზე ახალი საავადმყოფო აშენდება.

  • ღარიბაშვილის ამ განცხადებას საავადმყოფოს თანამშრომლების მხრიდან არაერთი პროტესტი მოჰყვა. ისინი მოითხოვდნენ კლინიკის დემონტაჟის გადაწყვეტილების გაუქმებას.

გაიგე მეტი: რესპუბლიკური საავადმყოფოს ექიმებმა, კლინიკის დემონტაჟის შეწყვეტის მოთხოვნით, მსვლელობა გამართეს

მსგავსი: რესპუბლიკურ საავადმყოფოსთან დაკავშირებით ხელისუფლების გეგმა კრიზისს ქმნის — რა გავარკვიეთ მედპერსონალისგან