მოკლედ: რესპუბლიკური საავადმყოფოს თანამშრომლებმა მეტრო რუსთაველიდან პარლამენტის შენობამდე მსვლელობა გამართეს მოთხოვნით — გაუქმდეს საავადმყოფოს დემონტაჟის ბრძანება.

დეტალები: რესპუბლიკური საავადმყოფოს თანამშრომლების ნაწილი მთავრობის მიერ შემოთავაზებული კომპენსაციების პაკეტს არ თანხმდება და მოითხოვენ კლინიკის დემონტაჟის გადაწყვეტილება გაუქმდეს.

  • "რესპუბლიკური სპეციალურად გადაიყვანეს ისეთ რეჟიმში, რომ ყოფილიყო წამგებიანი საავადმყოფო. გააუქმეს ძალიან ბევრი სერვისი, მათ შორის, ისეთები როგორიც არის, კარდიოქირურგია, არითმოლოგია, თვალი, რომლებიც საკმაოდ შემოსავლიანი დარგები იყო. ამ სერვისების გაუქმების შემდეგ უკვე დაიწყო მიზანმიმართულად დახურვა იმ განყოფილებების, რომლებიც კოვიდის დროს ფუნქციონირებდა, რადგან ხელი შეშლოდა საავადმყოფოს მუშაობაში, ფუნქციონირებაში და ადვილად ეთქვათ, რომ რესპუბლიკური არის წამგებიანი კლინიკა და ამიტომ დახურვის ერთ-ერთი მიზეზი ეს უნდა ყოფილიყო", — ამბობს ერთ-ერთი ექიმი ტვ პირველთან.

კონტექსტი: 22 იანვარს, ირაკლი ღარიბაშვილმა მთავრობის სხდომაზე განაცხადა, რომ დაინგრევა რესპუბლიკური საავადმყოფოს შენობა და მის ბაზაზე ახალი საავადმყოფო აშენდება. ამ განცხადების შემდეგ, მთავრობამ რესპუბლიკურის თანამშრომლებისთვის საკომპენსაციო პაკეტი შემოიღო, რომელზეც საკუთარი პოზიციის დაფიქსირებისა და არჩევანის გასაკეთებლად, დრო 5 მარტამდე განისაზღვრა.

შეთავაზებების პაკეტის მიხედვით,

  • ნებისმიერი თანამშრომელი, რომელიც მხოლოდ რესპუბლიკურ საავადმყოფოშია დასაქმებული, კომპენსაციის სახით, ერთჯერადად, 12 თვის ხელფასით იქნება უზრუნველყოფილი;
  • თუ კლინიკის თანამშრომელი სხვა დაწესებულებაშიც მუშაობს, კომპენსაციის სახით, 4 თვის ხელფასს მიიღებს;
  • სამედიცინო პერსონალი, რომელიც 12-თვიან კომპენსაციაზე უარს განაცხადებს, ჯანდაცვის სამინისტრო, სხვა სამედიცინო კლინიკაში, იმავე პოზიციაზე დასაქმებასა და 4 თვის ხელფასის ოდენობით კომპენსაციას შესთავაზებს;
  • სამედიცინო პერსონალი, რომელიც არ მუშაობს სხვა დაწესებულებაში და სამინისტრო, ალტერნატიულ სამსახურს ვერ შესთავაზებს, უწყება, 3 წლის განმავლობაში, დასაქმებამდე, ყოველთვიურ სახელფასო ანაზღაურებას გადაუხდის.

მსგავსი: რესპუბლიკური საავადმყოფოს თანამშრომლებს, საკომპენსაციო პაკეტის ასარჩევად დრო 5 მარტამდე განესაზღვრათ