16 ივლის HBO-ზე სერიალ სამეფო კარის თამაშების მეშვიდე სეზონის პრემიერა გაიმართა.

ერთწლიანი ლოდინი რომ ძალიან რთული იყო, ამაზე ისიც მიანიშნებს, რომ სერიის დაწყების მომენტიდან რამდენიმე წუთში საიტი HBO Now ჯერ შეფერხებით ამუშავდა, შემდეგ კი გაითიშა. საბედნიეროდ არხი ამ პრობლემას მომზადებული დახვდა და პრობლემის მოსაგვარებლად რამდენიმე წამი დასჭირდათ.

რაც შეეხება ახალი სეზონის პირველ ეპიზოდს, Dragonstone, როგორც მოსალოდნელი იყო და როგორც სამეფო კარის თამაშების შემთხვევაში ხდება ხოლმე, სერიალმა თავისი შედეგი კიდევ ერთხელ გააუმჯობესა.

სერიალს საერთო ჯამში 16,1 მილიონმა ადამიანმა უყურა პირდაპირ ეთერში. გასათვალისწინებელია ის, რომ ამ რაოდენობაში არ შედის სხვადასხვა ვებ გვერდებსა თუ პირატულ საიტებზე დადებული სერიის მაყურებელთა რიცხვი.

მაგალითად, თუ წინა წლებს შევადარებთ, სერიალის პირველი სეზონის პირველ სერიას პირდაპირ ეთერში 2.22 მილიონმა ადამიანმა უყურა, შემდეგ კი ეს რიცხვი სეზონიდან სეზონამდე უფრო და უფრო იზრდებოდა, ამის ნათელი მაგალითია ისიც, რომ წინა სეზონის ფინალურ სერიას 8 მილიონზე მეტი მაყურებელი ჰყავდა.

სამეფო კარის თამაშების მეორე სერია, Stormborn, 23 ივლისს გავა პირდაპირ ეთერში.