მოკლედ: ფინანსთა სამინისტროს საგამოძიებო სამსახურის ინფორმაციით, დააკავეს პირი, რომელმაც, გადასახადებიდან თავის არიდების გზით, სახელმწიფო ბიუჯეტი ჯამში 3 223 841 ლარით დააზიანა.

დეტალები: უწყების თანახმად, ბრალდებულს სხვადასხვა პირზე ჰქონდა რეგისტრირებული კომპანიები, რომლის ფაქტობრივი ხელმძღვანელიც თვითონ იყო.

  • 2021-2022 წლებში ის აღვევდა საგადასახადო კანონმდებლობას და შემოსავლების არასწორ დეკლარირებას ახდენდა.
  • "გამოძიებით დადგინდა, რომ ბრალდებულს, სხვადასხვა პირზე რეგისტრირებული ჰქონდა კომპანიები, რომლის ფაქტობრივი ხელმძღვანელიც თავად იყო. უკანონო მატერიალური სარგებლის მიღების მიზნით, ბრალდებული ხსენებული კომპანიების სახელით სამეწარმეო საქმიანობის განხორციელებისას, 2021-2022 წლების პერიოდში, საგადასახადო კანონმდებლობის დარღვევით, სისტემატურად ახდენდა შემოსავლების არასწორ დეკლარირებას, რა გზითაც, მან თავი აარიდა სახელმწიფო ბიუჯეტის სასარგებლოდ ჯამში 3 223 841 ლარის გადახდას", — წერია განცხადებაში.

ბოლო ხაზი: გამოძიება მიმდინარეობს საქართველოს სისხლის სამართლის კოდექსის 218-ე მუხლის მე-2 ნაწილით, რაც სასჯელის სახით ითვალისწინებს თავისუფლების აღკვეთას 5-დან 8 წლამდე ვადით.