ფილმ მისტერ და მისის სმიტების მიხედვით გადაღებული ამავე სახელწოდების სერიალი სულ რამდენიმე დღის წინ გამოვიდა. შოუში მთავარ როლებს მსახიობი დონალდ გლოვერი და მაია ერსკინი ასრულებენ.

თავდაპირველად იგეგმებოდა, რომ ერსკინის ნაცვლად ჯეინ სმიტის როლი ფიბი უოლერ-ბრიჯს უნდა მოერგო და გლოვერთან ერთად სერიალის სცენარისტიც ყოფილიყო. პრემიერის შემდეგ ფილმში მთავარი როლის შემსრულებელმა და შოუს შემქმნელმა, დონალდ გლოვერმა, გაამხილა მიზეზები, რის გამოც ფიბი პროექტში აღარ მონაწილეობს.

გლოვერს და უოლერ ბრიჯს ერთად აქამდე ფილმ Solo: A Star Wars Story-ში უთამაშიათ, რის გამოც დონალდმა ჩათვალა, რომ ერთმანეთს ახალ პროექტშიც კარგად შეეწყობოდნენ, მაგრამ ასე არ აღმოჩნდა.

"იმის გამო, რომ ფიბისთან მუშაობა მომწონდა და ვმეგობრობდით, ვფიქრობდი, რომ ამ სერიალს ერთად თავს კარგად გავართმევდით, მაგრამ ასე არ მოხდა. აღმოჩნდა, რომ ერთმანეთთან თავს საკმარისად კომფორტულად არ ვგრძნობდით და ბოლომდე გულწრფელები ვერ ვიქნებოდით", — ხსნის გლოვერი.

დონალდის თქმით, ფიბიმ სერიალ Fleabag-ის სცენარი მარტომ დაწერა და განსხვავებული სამუშაო კულტურა ჰქონდა, გლოვერს კი სურდა, რომ ერთმანეთთან თავისუფლად ხუმრობა შესძლებოდათ ან პირდაპირ ეთქვათ, როცა რაღაც იდეა არ მოსწონდათ.

როგორც აღმოჩნდა, ლიდერობა ორივეს უყვარდა, თუმცა სხვადასხვანაირი მიდგომები ჰქონდათ და ბევრ რამეზე ვერ თანხმდებოდნენ. მსახიობი ამ სიტუაციას განქორწინებას ადარებს და ამბობს, რომ იმაზე მსჯელობა მოუწიათ, პარტნიორობის გაწყვეტის შემდეგ სერიალი ვის დარჩებოდა.

"ჩანდა, რომ ფიბი ამ შოუს იდეით ბოლომდე აღფრთოვანებული არ იყო და მისტერ და მისის სმიტების სტილი მისას არ ჰგავდა, ამიტომ სერიალზე მუშაობა მე გავაგრძელე", — ამბობს მსახიობი.

დონალდი ერსკინთან მუშაობის გამოცდილებაზეც ჰყვება და აღნიშნავს, რომ ეცადა, სცენარი მაიას ტიპაჟისთვის მოერგო.