მოკლედ: მიხეილ სააკაშვილი ეხმიანება პრეზიდენტის გამოსვლას პარლამენტში და წერს, რომ ეთანხმება სალომე ზურაბიშვილს, ჩამოყალიბდეს ერთობლივი პროევროპული ძალების საკოორდინაციო ფრონტი.

  • ის პირველ ნაბიჯად, ყველა დასავლურ ძალას სთავაზობს, ჩამოყალიბდნენ არჩევნებში გამარჯვების შემდეგ, ერთობლივ საპრეზიდენტო კანდიდატზე.

დეტალები: "მე დაახლოებით ვხვდები, თუ ვინ იკვეთება ასეთ კანდიდატად, მაგრამ ასევე სხვების აზრის გაგება მაინტერესებს", — წერს სააკაშვილი ფეისბუქზე.

  • ამასთან, ის ეთანხმება მოქმედ პრეზიდენტს, რომ ოპოზიციურმა პარტიებმა უნდა შეწყვიტონ ერთმანეთის ლანძღვა და "სამიზნე გაასწორონ ოლიგარქზე".
  • "პრეზიდენტის დღევანდელმა გამოსვლამაც და საერთოდ, იმ პოლიტიკურმა ატმოსფერომ, რომელიც შექმნილია ნათლად დაადასტურა, რომ ოლიგარქის მმართველობას წყალი აქვს შეყენებული და ამ ისტორიულ არჩევნებზე ჩვენ მას მიტაცებული საქართველო კლანჭებიდან აუცილებლად უნდა გავაგდებინოთ და ქართველი ხალხი სიღატაკისგან, უპერსპექტივობისგან და საბოლოო განადგურებისგან დავიხსნათ", — წერს სააკაშვილი.

კონტექსტი: სალომე ზურაბიშვილმა პარლამენტში, ყოველწლიური მოხსენებისას თქვა, რომ აპირებს შექმნას "ერთობის პლატფორმა ევროპისთვის".

  • პრეზიდენტის ადმინისტრაციასთან დაარსდება საკოორდინაციო ცენტრი, რომელიც "ევროპულ პრიორიტეტებზე ყველა კონკრეტულ შეთავაზებას მოუყრის თავს და დიალოგით და კონსენსუსის წესით, ხელს შეუწყობს ერთობლივი დოკუმენტის ჩამოყალიბებას".
  • "ამ მიზნით, მომავალ დღეებში, ვაპირებ მოვიწვიო პოლიტიკური სპექტრის წარმომადგენლები და სამოქალაქო საზოგადოების დაინტერესებული პირები. ეს მიდგომა ინკლუზიური უნდა იყოს და მზად ვარ შევხდე და მოვუსმინო ყველას", — თქვა პრეზიდენტმა.

მისი ეს განცხადება შეაფასა ქართული ოცნების პრემიერობის კანდიდატმა ირაკლი კობახიძემ და თქვა, რომ პრეზიდენტი აპირებს, შექმნას "ფსევდოშუაშისტური პოლიტიკური ძალა", ამისთვის გადადგება სექტემბერში და არჩევნებში მიიღებს მონაწილეობას.

  • "ერთადერთი ეს იყო საინტერესო, რაც შეიძლება, ამოვიკითხოთ ჩვენ მისი გამოსვლიდან.
  • დანარჩენი იყო რადიკალური ოპოზიციის წარმომადგენლის ჩვეულებრივი გამოსვლა"-თქვა კობახიძემ.