2024 წლის 1-ელ თებერვალს ქართული ოცნების პოლიტსაბჭომ ოფიციალურად წარადგინა პრემიერ-მინისტრობის კანდიდატად ირაკლი კობახიძის კანდიდატურა. ყოფილი პრემიერი, ირაკლი ღარიბაშვილი კი, მმართველი პარტიის თავმჯდომარედ აირჩიეს.

ამას წინ უძღოდა პარტია ქართული ოცნების წესდებაში შეტანილი ცვლილება, რომლის თანახმად, პრემიერობის კანდიდატს პარტიის საპატიო თავჯდომარე წარადგენს. პარტიის საპატიო თავმჯდომარედ კი ბიძინა ივანიშვილი აირჩიეს 2023 წლის 30 დეკემბერს.

რა ხდება ახლა: საქართველოს პარლამენტმა ნდობა უნდა გამოუცხადოს პრემიერ-მინისტრობის კანდიდატს, ამ შემთხვევაში, ირაკლი კობახიძეს და ასევე, მის მიერ წარდგენილ სამთავრობო პროგრამასა და მინისტრთა კაბინეტის კანდიდატებს.

რას ამბობს კონსტიტუცია: პარლამენტი მთავრობის უფლებამოსილების მოხსნიდან, აგრეთვე პრემიერ-მინისტრის გადადგომიდან ან უფლებამოსილების სხვაგვარად შეწყვეტიდან 2 კვირის ვადაში ნდობას უცხადებს პარლამენტის არჩევნებში საუკეთესო შედეგის მქონე პოლიტიკური პარტიის მიერ წამოყენებული პრემიერმინისტრობის კანდიდატის მიერ წარდგენილ მთავრობას.

  • მთავრობის შემადგენლობასთან ერთად პარლამენტს წარედგინება სამთავრობო პროგრამა.
  • ნდობის მისაღებად საჭიროა პარლამენტის სრული შემადგენლობის უმრავლესობის მხარდაჭერა.
  • ქართული ოცნებას პარლამენტში უმრავლესობას ფლობს, შესაბამისად, მათ შეუძლიათ დაამტკიცონ პრემიერობის ახალი კანდიდატი და მინისტრთა კაბინეტიც.

რა როლი აქვს პრეზიდენტს: მთავრობისთვის ნდობის გამოცხადებიდან 2 დღის ვადაში საქართველოს პრეზიდენტი თანამდებობაზე ნიშნავს პრემიერ-მინისტრს, ხოლო პრემიერ-მინისტრი მისი დანიშვნიდან 2 დღის ვადაში — მინისტრებს.

  • თუ საქართველოს პრეზიდენტი დადგენილ ვადაში არ დანიშნავს პრემიერ-მინისტრს, იგი დანიშნულად ჩაითვლება.