რა ხდება: თბილისში, ზანდუკელის ქუჩის #2-ში საპროტესტო აქცია დაანონსდა სააპელაციო სასამართლოს გადაწყვეტილების საპასუხოდ, რომელმაც აკაკი ჩიქობავასა და გიორგი ხასაია პატიმრობაში დატოვა. შესაბამისი გადაწყვეტილება დღეს გამცოხადდა.

• საპროტესტო აქციის გამართვის შესახებ ვახუშტი მენაბდემ (პლატფორმა კომენტარი) დააანონსა: "ნახევარ საათში ვიწყებთ. გელოდებით ზანდუკელის #2-ში, რუსთაველის მაკდონალდსის უკან!", — დაწერა მან.

მოთხოვნებია:

• გათავისუფლდნენ აკაკი ჩიქობავა და გიორგი ხასაია;
• გამოცხადდეს მოტარორიუმი და აიკრძალოს უკანასკნელი საცხოვრებლიდან გამოსახლება.

ხასაია-ჩიქობავას საქმის ქრონოლოგია

რატომ დააკავეს ჩიქობავა და ხასაია: მათ თბილისში, კეკელიძის ქუჩაზე ხატიაშვილების ოჯახის მხარდამჭერი აქციისას, აღსრულების პოლიციის მანქანის დაზიანებაში ედებათ ბრალი.

• მანქანის შუშების ჩამტვრევის ფაქტზე, 3-6 წლამდე პატიმრობა ემუქრებათ.
• შემთხვევა 2024 წლის 23 იანვარს მოხდა.
• 25 იანვარს კაკო ჩიქობავას და გიორგი ხასაიას, აღკვეთის ღონისძიების სახით პატიმრობა შეეფარდათ — მოსამართლე დავით კურტანიძემ, პატიმრობასთან დაკავშირებით, პროკურატურის შუამდგომლობა გაიზიარა, დაცვის მხარე კი დაკავებულების გათავისუფლებას ითხოვდა.
• 2024 წლის 30 იანვარს საქმის პროკურორმა, როინ ხინთიბაძემ, ტელეარხ რუსთავი 2-თან ინტერვიუში თქვა, რომ "იმ შემთხვევაში, თუ ბრალდებულები დანაშაულს აღიარებენ და ზიანს აანაზღაურებენ, ბრალდების მხარე მზად არის, პატიმრობა შეიცვალოს უფრო ნაკლებად მკაცრი აღკვეთის ღონისძიების გამოყენებით".
• კაკო ჩიქობავა და გიორგი ხასაია მხოლოდ ნაწილობრივ აღიარებენ ბრალდებას — აღიარებენ ნივთის დაზიანების ფაქტს, თუმცა, არ ეთანხმებიან ბრალდების იმ ნაწილს, სადაც საუბარია იმაზე, რომ ამას ჯგუფური ხასიათი ჰქონდა.

სოლიდარობის კამპანია დაკავებულთა მიმართ: დაკავებულების მიმართ სოლიდარულია აკადემიური საზოგადოება. ორივე მათგანი — ხასაიაც და ჩიქობავაც ლექტორები არიან.

• 26 იანვარს, მათი გათავისუფლების მოთხოვნით მაისის სტუდენტურმა მოძრაობამ თსუ-ს ადმინისტრაცია დაიკავა.
• 30 იანვარს, ილიას უნივერსიტეტის რექტორმა, ნინო დობორჯგინიძემ საჯარო წერილით მიმართა სააპელაციო სასამართლოს, რომელშიც ნათქვამია, რომ დაკავებულ ლექტორებს აკადემიური საზოგადოება ახასიათებს, როგორც მაღალი მოქალაქეობრივი პასუხისმგებლობის მქონე ახალგაზრდებს.
• ილიას უნივერსიტეტის რექტორის განცხადებას თბილისის სახელმწიფო უნივერსიტეტის რექტორის ჯაბა სამუშიას განცხადება მოჰყვა: "აკაკი ჩიქობავა არის ივანე ჯავახიშვილის სახელობის თბილისის სახელმწიფო უნივერსიტეტის მოწვეული ლექტორი. მიგვაჩნია, რომ მის მიმართ გამოყენებული აღკვეთის ღონისძიების ფორმა არის მკაცრი და ვთხოვთ სასამართლოს აღნიშნული აღკვეთის ღონისძიება შეცვლილი იქნას აღკვეთის ღონისძიების უფრო მსუბუქი ფორმით", — წერია განცხადებაში.
• მანამდე, 27 იანვარს, თბილისის სახელმწიფო უნივერსიტეტის პროფესორებმა განაცხადეს, რომ მზად არიან, თავდებში ჩაუდგნენ აკაკი ჩიქობავას, როგორც თსუ-ს მოწვეულ პროფესორს.