რა ხდება: პროკურატურა თბილისში, რამდენიმე ადგილას, საგამოძიებო-საპროცესო მოქმედებებს ატარებს.

  • უწყების ინფორმაციით, საქმე ეხება ტრანსნაციონალურ დანაშაულს, კერძოდ, თაღლითური ქოლცენტრების სისხლის სამართლის საქმეს.
  • პროკურატურის განცხადებაში წერია, რომ გამოძიება ევროპელ პარტნიორებთან ერთად მიმდინარეობს.

კონტექსტი: ქოლცენტრებთან დაკავშირებით, ქართული სამართალდამცავი უწყებები ინფორმაციას პერიოდულად ავრცელებენ.

  • ბოლო ასეთი შემთხვევა იყო ქოლცენტრის აღმოჩენის მიზნით ჩხრეკა თბილისში, ფანჯიკიძის ქუჩაზე მდებარე ბიზნესცენტრში, სადაც ჟურნალისტ ელისო კილაძის და მისი ჩართულობით დაფუძნებული კომპანიები საქმიანობენ.
  • კილაძემ თქვა, რომ სამართალდამცავები ადგილზე ანონიმური ზარის საფუძველზე მივიდნენ.
  • ის ვარაუდობდა, რომ საქმეში დავით კეზერაშვილის კვალი იყო.
  • ქოლ-ცენტრების კონტექსტში არაერთხელ გამოიკვეთა თავდაცვის ყოფილი მინისტრის, დავით კეზერაშვილის გვარი. BBC Eye-მ გასული წლის აპრილში გამოაქვეყნა საგამოძიებო მასალა, სადაც ეწერა, რომ ე.წ. ქოლცენტრების მასშტაბური თაღლითური სქემის ფიგურანტი სწორედ კეზერაშვილი იყო.
  • მოგვიანებით, ფანჯიკიძის ქუჩაზე ჩატარებული ჩხრეკის შემდეგ, ელისო კილაძემ თქვა, რომ ყოფილი თავდაცვის მინისტრის ჩართულობაზე თაღლითურ სქემაში ის BBC-ის სიუჟეტამდეც საუბრობდა.
  • ანონიმური ზარის უკან კი, რომლის შემდეგაც ბიზნესცენტრში სამართალდამცველები შევიდნენ, მისი ვარაუდით, სწორედ დავით კეზერაშვილი იდგა, "BBC-ის სკანდალის გადასაფარად".