BBC ე.წ. ქოლ-ცენტრების საქმეზე საგამოძიებო მასალას აქვეყნებს.

რატომ არის მნიშვნელოვანი: BBC-ის ცნობით, თაღლითობის გლობალურმა ქსელმა მილიარდ დოლარზე მეტი მიითვისა.

• სქემის მიხედვით, ქოლ-ცენტრების თანამშრომლებს წვდომა ჰქონდათ მონაცემთა ბაზაზე, ურეკავდნენ ადამიანებს, ადგენდნენ მათ ფინანსურ მდგომარეობას და სხვადასხვა სარგებელს სთავაზობდნენ. ნდობაში შესვლის შემდეგ კი ამ ადამიანების დანაზოგებს ითვისებდნენ.
• დანაზოგის მქონე მარტოხელა ადამიანებთან კი ქოლ-ცენტრის თანამშრომლები "მეგობრობდნენ" კიდეც.
• ამ სქემების მიღმა დგანან ჩვეულებრივ ქოლ-ცენტრები ლეგიტიმური ბიზნესის მრავალი მახასიათებლით.
• BBC Eye-მ დაადგინა ბიზნესმენების ქსელი, რომლებიც, გამოცემის ვარაუდით, ამ თაღლითურ ქსელს მართავს. მათი მტკიცებით, საქმეში ფიგურირებს ყოფილი თავდაცვის მინისტრი, დავით კეზერაშვილი.
• კეზერაშვილთან ინტერვიუს ჩაწერა BBC-მ ვერ შეძლო, მან გამოცემას ადვოკატების მეშვეობით განუცხადა, რომ კატეგორიულად უარყოფს რამე კავშირს მილტონის ჯგუფთან და თაღლითურ სქემებთან.
• TV ფორმულას ცნობით, თავდაცვის ყოფილი მინისტრი ბრალდებებთან დაკავშირებით განცხადებას გაავრცელებს.

დეტალები: ერთ წელზე მეტია, BBC Eye ასობით სხვადასხვა საინვესტიციო ბრენდისგან შემდგარ გლობალურ თაღლითურ ქსელს იკვლევს.

• გამოძიებისას გამოააშკარავეს 152 ბრენდი, მათ შორის Milton Group, რომლებიც, როგორც ჩანს, თაღლითური ქსელის ნაწილია.
• Milton Group-ის ერთ-ერთი საინვესტიციო ბრენდი აფინანსებდა ესპანურ საფეხბურთო კლუბს და აქვეყნებდა რეკლამას მთავარ გაზეთებში, რაც მას სანდოობას ანიჭებდა.
• ნოემბერში, BBC Eye თან ახლდა გერმანიისა და საქართველოს პოლიციას თბილისში ქოლ-ცენტრის დარბევისას.
• გამოცემა აცხადებს, რომ თბილისის ოფისში შეღწევისას კომპიუტერების ეკრანზე ნახეს ბრიტანული ტელეფონის ნომრების მთელი წყება. ისინი გაესაუბრნენ რამდენიმე მათგანს, რომლებმაც დაადასტურეს, რომ ახლახან ჩადეს ფული საქმეში.
• ერთ-ერთ მაგიდაზე იპოვეს ჩანაწერების სია, შემდეგი დეტალებით: "სახლის პატრონი, არანაირი პასუხისმგებლობა"; "50 ათასი დანაზოგი"; "პოლონეთიდან, ბრიტანეთის მოქალაქე"; "50 ათასი აქციები."

გამოძიება: BBC Eye-მ დაიწყო მილტონის ჯგუფის კორპორატიული დოკუმენტების შესწავლით და ჯგუფის კომპანიებს შორის გარკვეული კავშირები გამოავლინა.

• Milton-ის სავაჭრო პლატფორმების დირექტორებად ან მხარდამჭერი ტექნიკური კომპანიების სიაში 5 სახელი გამოიკვეთა — დავით თოდუა, რატი ჭელიძე, გურამ გოგეშვილი, იოსებ მგელაძე და მაიკლ ბენმინი.
• გამოცემის ვარაუდით, ამ კომპანიების უკან დგას დავით კეზერაშვილიც, მაგრამ არ არსებობს საჯაროდ ხელმისაწვდომი დოკუმენტები, რომლებიც კეზერაშვილს ქსელთან დააკავშირებს — თუმცა, მისი სახელი ფიგურირებს პანამას დოკუმენტებში, როგორც თაღლითურ ქსელთან დაკავშირებული კომპანიის ერთ-ერთი დამაარსებლის ან მეწილის.

BBC-ის ცნობით, გამოცემას Milton-თან დაკავშირებული კომპანიების რამდენიმე ყოფილმა თანამშრომელმა კონფიდენციალურად უთხრა, რომ მათ ჰქონდათ პირდაპირი ურთიერთობა კეზერაშვილთან და იცოდნენ, რომ იგი Milton Group-ში იყო ჩართული.

• მათი დაკვირვებით, კეზერაშვილი ხშირად ავრცელებს თაღლითური სავაჭრო პლატფორმების პოპულარიზაციას სოციალურ მედიის პირად ანგარიშებზე. ხოლო LinkedIn-ზე ბიზნესმენმა თავისი ანგარიში ექსკლუზიური სამუშაო ადგილების პოპულარიზაციისთვის და მილტონთან დაკავშირებული კომპანიების შესახებ პოსტების გასაზიარებლად გამოიყენა.

• კეზერაშვილის საკუთრებაში არსებული რამდენიმე კომპანია იყენებდა კერძო ელფოსტის სერვერს, რომლის სხვა მომხმარებლები მხოლოდ Milton Group-ის კომპანიები იყვნენ.

• მისი სარისკო კაპიტალის ფირმა, Infinity VC, ფლობდა ბრენდინგის და ვებ დომენებს კომპანიებისთვის, უზრუნველყოფდა სავაჭრო პლატფორმის ტექნოლოგიას თაღლითებისთვის.

• BBC-ის ინფორმაციით, კეზერაშვილი ასევე ფლობს კიევის საოფისე შენობას, სადაც განთავსებული იყო როგორც თაღლითური სატელეფონო ცენტრი, ასევე ტექნოლოგიური კომპანიები, რომლებიც პროგრამულ უზრუნველყოფას ხელმძღვანელობდნენ — ოფისები, რომლებიც პოლიციამ ნოემბერში დაარბია. ის ასევე ფლობს თბილისის საოფისე ბლოკს, რომელიც მოიცავდა ტექნოლოგიურ კომპანიასაც.

• როდესაც BBC-მ შეისწავლა მილტონის ჯგუფთან დაკავშირებული ოთხი კაცის სოციალური მედიის პროფილები, საქორწილო წვეულებებისა და სხვა სოციალური ღონისძიებების გამოქვეყნებული სურათებიდან ირკვევა, რომ მათ ყველას მჭიდრო სოციალური კავშირები ჰქონდათ კეზერაშვილთან.

• კეზერაშვილი ფეისბუქში მეგობრობს მინიმუმ 45 ადამიანთან, რომლებიც დაკავშირებულია მილტონის ჯგუფურ თაღლითებთან და BBC-ის მიერ გამოვლენილი ოთხი უფროსი ფიგურიდან ერთ-ერთი მისი ბიძაშვილია.