მოკლედ: თბილისში, კეკელიძის ქუჩაზე აღსრულების ბიურომ ხატიაშვილების ოჯახის გამოსახლების პროცესი დაიწყო. ისინი მიმართავენ სპეციალურ საშუალებებს სახლში შესაღწევად. დაკავებულია რამდენიმე პირი.

დეტალები: საპოლიციო ძალები ფიზიკურ ძალას იყენებენ გამოსახლების პროცესისთვის.

  • ამას მოჰყვა ფიზიკური დაპირისპირება ადგილზე.
  • დაპირისპირების შედეგად, დაზიანდა აღსრულების პოლიციის ბიუროს ავტომობილიც.

ფოტო: მარიამ მერლანი / On.ge

ფოტო: მარიამ მერლანი / On.g

მანამდე გავრცელებული ინფორმაციის მიხედვით, მოქალაქეები ამბობენ, რომ "რაღაც ნივთიერების სუნს გრძნობენ".

  • "სუნთქვა იყო შეუძლებელი, არ ვიცი გაზი იყო თუ სხვა ნივთიერება, ფაქტია ყველას გვახველებდა და ძალიან გვიჭირდა სუნთქვა", — უთხრა On.ge-ს სოფო ვერძეულმაც, პლატფორმა კომენტარის სამართლის პოლიტიკის მიმართულების რედაქტორმა.
  • "პოლიციამ გაზი გაუშვა სახლში, გამოსახლების პროცესში, ხალხი რომ აიძულოს შენობის დასატოვებლად", — წერს სოციალურ ქსელში ვახუშტი მენაბდე, კომენტარის თანადამფუძნებელი.
  • ადგილზე რაიმე ნივთიერების გამოყენების შესახებ, სამართალდამცავებს ოფიციალურად არ განუცხადებიათ.

კონტექსტი: აღსრულების ბიურო ოჯახის გამოსასახლებლად კეკელიძის ქუჩაზე დღეს დილით მივიდა, თუმცა, ადგილზე მათ მოქალაქეების დიდი ჯგუფი დახვდა.

  • საცხოვრებელ კორპუსთან შეკრებილები ითხოვენ, რომ გამოსახლების პროცესი შეჩერდეს.
  • ისინი ცდილობენ, ამ პროცესის დაწყებას ხელი შეუშალონ.
  • ადგილზე მობილიზებულია პოლიცია.
  • სოციალურ ქსელში დაანონსებულია როგორც ამ ოჯახის, ასევე, კიდევ ორი ოჯახის მხარდამჭერი აქციაც, რომელთაც აღსრულების ბიურო მომდევნო დღეებში — 24 და 26 იანვარს გასახლებას უპირებს.

არქივიდან: აღსრულების ბიურო კეკელიძის #1-დან ხატიაშვილების ოჯახის გამოსახლებას 2019 წლიდან ცდილობს. აქედან ბოლო მცდელობა მათ 2023 წლის 23 იანვარს ჰქონდათ, თუმცა, სავარაუდოდ, საზოგადოებრივი პროტესტის გამო, გასულ წელს ბიურომ პროცესი შეაჩერა.