ალტე უნივერსიტეტი აბიტურიენტების მხარდაჭერას აქტიურ რეჟიმში განაგრძობს და ახალგაზრდებისთვის სხვადასხვა ტიპის ღონისძიებებსა და აქტივობებს ახორციელებს.

მისი მიზანი უცვლელია, შექმნას სივრცე, სადაც დამამთავრებელი კლასის მოსწავლეებს შესაძლებლობა ექნებათ, მიიღონ მათ ინტერესებზე მორგებული ის, სერვისები, რომლებიც მათ პროფესიის სწორად შერჩევაში, ეროვნული გამოცდების წარმატებით ჩაბარებასა და საუნივერსიტეტო ცხოვრებისთვის მომზადებაში დაეხმარება.

სწორედ მსგავსი ტიპის აქტივობებს სთავაზობს მოსწავლეებს ალტე უნივერსიტეტის ბაზაზე დაფუძნებული აბიტურიენტების კლუბი, რომელიც უკვე მეორე წელია, ფუნქციონირებს და 5000-მდე აბიტურიენტს აერთიანებს.

რაც ყველაზე მთავარია, თითოეული პროექტი ხორციელდება როგორც თბილისში, ასევე რეგიონებში მცხოვრები ახალგაზრდებისთვის.

ალტე უნივერსიტეტის მარკეტინგული პროექტების ხელმძღვანელი, ხატია მათიკოშვილი აღნიშნავს, რომ რეგიონებში აღნიშნული პროექტი ახალგაზრდებს დაეხმარება იმ გამოწვევებისა და ბარიერების დაძლევაში, რომელსაც თუნდაც პროფესიის შერჩევის დროს ხვდებიან. სწორედ ამიტომ, პარტნიორ ორგანიზაციებთან თანამშრომლობით ყვარლის ევროკლუბთან ერთად შეიქმნა აბიტურიენტთა კლუბის პირველი რეგიონული ცენტრი.

მიუხედავად იმისა, რომ ალტე უნივერსიტეტი და აბიტურიენტების კლუბი რეგიონებს საინტერესო პროექტებით ხშირად სტუმრობენ, რეგიონებში მცხოვრები მოსწავლეებისთვის აბიტურიენტების კლუბის სერვისებზე ხელმისაწვდომობის ზრდის მიზნით რეგიონული ცენტრების გახსნის საჭიროებაც დადგა. ამ გზით ადგილობრივ მოსწავლეებს ალტე უნივერსიტეტი შესაძლებლობას უქმნის, დაესწრონ სხვადასხვა შეხვედრას და ვორქშოფს სახლთან ახლოს, ფიზიკურ სივრცეში.

როგორც აღვნიშნეთ, აბიტურიენტების კლუბის პირველი რეგიონული ცენტრი ყვარელში, ევროკლუბის ბაზაზე გაიხსნა და ახალგაზრდებისთვის პირველი შეხვედრაც დაგეგმილია, რომლისთვისაც შერჩეულია აბიტურიენტების ყველაზე აქტუალური და მნიშვნელოვანი თემა — "პროფესიის არჩევა და კარიერის დაგეგმვა". ღონისძიებას ტრენერი და გაეროს ასოციაციაში სპეციალური პროექტების მენეჯერი გიორგი ექსეულიძე წარუძღვება.

ვალერი ტოჩილაშვილი, აბიტურიენტების კლუბის ამბასადორი და აბიტურიენტების კლუბის ყვარლის რეგიონული ცენტრის კოორდინატორი ამბობს, რომ კლუბის ყველა პროექტი ალტე უნივერსიტეტის ხელშეწყობით ხორციელდება და გარდა ფინანსური მხარდაჭერისა, უნივერსიტეტი კლუბს ინტელექტუალური რესურსითაც უზრუნველყოფს.

ალტე უნივერსიტეტის გუნდი დაუღალავად აგრძელებს საგანმანათლებლო პროექტების მხარდაჭერას, მანამდე კი 27 იანვრის შეხვედრისთვის ემზადებიან.

შეხვედრა 27 იანვარს, 14:00 სთ-ზე ყვარლის ევროკლუბის სივრცეში, აბიტურიენტების კლუბის რეგიონულ ცენტრში გაიმართება.

მეტსაც გეტყვით, შეხვედრას ინტერაქციული ფორმატი ექნება და მონაწილეები შეძლებენ, ადგილზე სხვადასხვა ტიპის როლური თამაშებით გამოცადონ საკუთარი თავი სხვადასხვა პროფესიებში.

ამ პროექტმა შესაძლოა, მოსწავლეები, რომლებიც ჯერ კიდევ ძიების პროცესში არიან, სხვადასხვა მიმართულებით დააფიქროს, შედეგად კი — მათ უფრო რაციონალურად შეძლონ კარიერული დაგეგმვა და განვითარება.