თანამედროვე მუსიკის ინდუსტრიაში 10 წელი ძალიან დიდი დროა. ამ ხნის განმავლობაში შეიძლება ტრენდები მრავალგზის შეიცვალოს, ახალი ვარსკვლავები გამოჩნდნენ, კარიერული სიმაღლეები დაიპყრონ და უკვე თავად იქცნენ "ტრენდსეტერებად". მაგალითად, 10 წლის წინ, 2014-ში, ჯერ კიდევ არ ვიცოდით ბილი აილიშის ან ოლივია როდრიგოს სახელი, დღეს კი ორივე მათგანი უკვე კაშკაშა ვარსკვლავია.

მოკლედ, ბევრი რომ არ გავაგრძელოთ საუბარი და უფრო მძაფრად გაგრძნობინოთ, როგორ "მიფრინავს დრო და მიდიან შორს წლები ქცეული სიზმრებად", ერთად გავიხსენოთ, რას ვუსმენდით მთელი ათწლეულის წინ.

1. The Chainsmokers-ის #SELFIE

2014-ში ინტერნეტმა ბევრი ახალი სიტყვა და ტრენდი აიტაცა, ერთ-ერთი მათგანი კი სწორედ "სელფი" გახლდათ. ამ სახელწოდებით შეიქმნა The Chainsmokers-ის ცნობილი სიმღერაც, რომელიც ათი წლის უკან ლამის ყველა კლუბში ისმოდა.

2. Pitbull-ის We Are One (Ole Ola)

გინდ დაიჯერეთ, გინდ არა, 2014-ის მსოფლიო საფეხბურთო ჩემპიონატიდან მთელი ათწლეული გავიდა. ჰოდა, იმ ზაფხულსაც სხვა რას მოვუსმენდით, თუ არა საგანგებოდ ამ ჩემპიონატისთვის დაწერილ ლათინოამერიკულ ჰანგებს?!

3. ტეილორ სვიფტის Shake It Off

2014 წელი ტეილორ სვიფტის უსაზღვრო პოპულარობის დასაწყისიც იყო. მანამდე უფრო მეტად ქანთრი სიმღერებით ცნობილმა მუსიკოსმა რიგით მეხუთე სტუდიური ალბომი 1989 გამოუშვა და მისი ერთ-ერთი სინგლით Shake It Off მთელი მსოფლიო ააცეკვა.

///

4. Jessie J-ის, არიანა გრანდესა და ნიკი მინაჟის Bang Bang

ათი წლის წინ მაინცდამაინც ბევრი კოლაბორაცია არ შექმნილა, მაგრამ მანამდე და მას შემდეგ შექმნილ დუეტებს თუ ტრიოებსაც გაუჭირდებათ Bang Bang-ის დონემდე მისვლა. ჯესი ჯეი, არიანა და ნიკი — სხვა თუ არაფერი, ათწლეულის შემდეგ შეგვიძლია დარწმუნებულები ვიყოთ, რომ ეს ლეგენდარული კოლაბორაცია არ დაგვსიზმრებია.

5. Coldplay-ის A Sky Full of Stars

2014-ში რომ ყველანი გამოუსწორებელ რომანტიკოსებად ვიქეცით და მთელი ზაფხული ღამის ცის ყურებაში გავატარეთ, ეს მხოლოდ Coldplay-ისა და მათი ჰიტის, A Sky Full of Stars-ის დამსახურებაა. სიმღერა ერთ-ერთი სინგლი იყო პოპჯგუფის მე-6 სტუდიური ალბომიდან Ghost Stories.

6. სემ სმიტის Stay with Me

ვინ გვაცადა ვარსკვლავების თვლა და ოცნება?! 2014-ში სემ სმიტი გამოჩნდა თავისი სადებიუტო ალბომით და ერთბაშად მელანქოლიურ განწყობაში ჩაგვძირა. Stay with Me, რომელიც მას შემდეგ ყველა წყვილის დაშორების არაოფიციალურ საუნდტრეკად იქცა, სწორედ ამ ალბომში შედის.

7. სიას Chandelier

მთლად სემ სმიტივით სევდიანი არა, მაგრამ ძალიან ემოციური კი გამოდგა სიას მეექვსე ალბომი 1000 Forms of Fear. ალბომიდან მთავარი სინგლი კი Chandelier იყო, რომელიც არაერთი ქვეყნის ჩარტების სათავეში აღმოჩნდა და ეს უნიჭიერესი ავსტრალიელი მუსიკოსი კიდევ უფრო ფართო წრეს გააცნო.

///

8. ედ შირანის Thinking Out Loud

2014-ში სულ სხვა სიმაღლე დაიპყრო ედ შირანმაც, რომელმაც მეორე სტუდიური ალბომი გამოუშვა და იქვე მოაყოლა სინგლი Thinking Out Loud. მომდევნო წელს სპოტიფაიზე ის პირველი სიმღერა გახდა, რომლის სტრიმების რაოდენობამ ნახევარ მილიარდს გადააჭარბა. ჰო, 2014-ში მართლაც გამოუსწორებელი რომანტიკოსები ვყოფილვართ...

9. იგი აზალიას და Charli XCX-ის Fancy

მორჩა, გვეყო მელანქოლია და რომანტიკა! 2014-ში არ იყო, იგი აზალიამ და Charli XCX-მა რომ "თვერქი" გვაცეკვეს?! ჩარტებზე რომ აღარაფერი ვთქვათ, Fancy-მ მაშინ "ვაინიც" დაიპყრო. ჰო, მართლა, ვაინები თუ გახსოვთ?

10. მეგან ტრეინორის All About That Bass

დაბოლოს — 2014-ის ყველაზე დიდი აღმოჩენა ალბათ მეგან ტრეინორი იყო, რომელიც ფურორით შემოიჭრა მუსიკის ინდუსტრიაში. სადებიუტო ალბომის გამოშვებამდე ერთი წლით ადრე ტრეინორმა პირველი სინგლი, All About That Bass, გვაჯახა და ყველა ტაშისკვრით აგვაცეკვა.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...