სურნელოვანი სანთლები პოპულარობას არ კარგავს, ამ პროდუქტების მწარმოებლები კი ყოველ წელს ცდილობენ, მომხმარებელი ორიგინალური არომატებით გაანებივრონ. თუმცა, ორიგინალური მაინცდამაინც სასიამოვნოს როდი ნიშნავს — სხვა თუ არაფერი, უკანალის და ვაგინის არომატიანი სანთლების ამბავი მაინც გეხსომებათ...

ახლა კი, დრო მოსულა, ნაბანი წყლის არომატიანი სანთელი გავიცნოთ. თანაც, არც მეტი, არც ნაკლები, ჯეიკობ ელორდის ნაბანი წყლის სურნელით.

საქმე ისაა, რომ ბოლო დროს ინტერნეტში ძალზედ პოპულარული გახდა 2023 წელს გამოსული ფილმი Saltburn, რომელშიც მთავარ როლებს ჯეიკობ ელორდი, როზამუნდ პაიკი და ბარი კიოგენი ასრულებენ. უფრო ზუსტად კი, სოციალური ქსელები მოიცვა ამ ფილმის ერთ-ერთი, საკმაოდ უცნაური სცენის განხილვამ. სცენაში ვხედავთ, როგორ ხვრეპს კიოგენის პერსონაჟი ოლივერი თავისი მეგობრის, ფელიქსის (ჯეიკობ ელორდი), ნაბან წყალს, რომელშიც ეს უკანასკნელი მასტურბირებდა...

ეს სცენა ჯერ უთვალავი მიმის შთაგონების წყაროდ იქცა, ახლა კი უკვე სურნელოვანი სანთელიც შეიქმნა მისი ინსპირაციით. "ჯეიკობ ელორდის ნაბანი წყალი" — სწორედ ამგვარი დასახელებით გამოჩნდა ახალი პროდუქტი ონლაინ ვაჭრობის პლატფორმებზე. არომატული სანთლის ღირებულება დაახლოებით $28-ს შეადგენს.

"კარგი სანთლის არომატს ვერაფერი შეედრება, განსაკუთრებით მაშინ, როცა ეს არომატი ჯეიკობ ელორდითა და იმითაა შთაგონებული, თუ როგორ წარმოგვიდგენია მისი უმაღლესობის სურნელი", — ვკითხულობთ პროდუქტის აღწერაში.

///

მისი უმაღლესობის სურნელით შთაგონებულ სანთელს კი სამი სხვადასხვა არომატი აქვს: პიკანტური, ვანილისა და ზღვის სიოსი.

ჯეიკობ ელორდი და ბარი კიოგენი Saltburn-ის პრემიერაზე.

ფოტო: Variety

Saltburn ოსკაროსანი ინგლისელი რეჟისორისა და მწერლის, ემერალდ ფინელის, უახლესი ნამუშევარია. ფილმი შთაგონებულია ივლინ ვოს ცნობილი რომანით, ბრაიდსჰედში დაბრუნება. მასში მოქმედება ვითარდება 2000-იანი წლების ინგლისში და გვიყვება ამბავს ორ სტუდენტზე, რომლებიც ზაფხულს ერთად ატარებენ ერთ-ერთი მათგანის მდიდრულ მამულში.

Saltburn-ის პრემიერა შარშან აგვისტოში შედგა ტელურაიდის კინოფესტივალზე. ფინელის ნამუშევარმა კრიტიკოსებისგან მეტწილად დადებითი შეფასება მიიღო, მასში შესრულებული როლებით კი კიოგენი და პაიკი ოქროს გლობუსის ნომინანტებიც გახდნენ.