რა ხდება: ლიბანში, ირანის მიერ მხარდაჭერილი დაჯგუფება ჰეზბოლა აცხადებს, რომ ისრაელის ავიადარტყმას მათი 4 წევრი ემსხვერპლა.

დეტალები: ლიბანის სახელმწიფო საინფორმაციო სააგენტოს ცნობით, ისრაელმა დაბომბა სამსართულიაი სახლი, შენობა მთლიანად დაინგრა.

  • მათივე ინფორმაციით, დაშავებულებს შორის არის 9 სამოქალაქო პირი.
  • ისრაელს არ დაუდასტურებია, რომ თავდასხმა მათ განახორციელეს.
  • გასულ ღამეს, ისრაელის შეიარაღებულმა ძალებმა სოციალურ მედიაში გაავრცელა ვიდეო, სადაც, მათი თქმით, ჩანს, თუ როგორ აფეთქებს ისრაელის თავდაცვის ძალები ლიბანში ჰეზბოლას სამხედრო ინფრასქტრუქტურას.
  • "საჰარო ძალებმა დაარტყეს ჰეზბოლას რამდენიმე სამიზნეს ლიბანში, მათ შორის, ტერორისტულ ინფრასტრუქტურას და სამხედრო ნაგებობებს", — აცხადებენ შეიარაღებულ ძალებში.

რა არის ჰეზბოლა

ეს არის შიიტური მუსლიმური ორგანიზაცია, რომელსაც ქვეყანაში დიდი პოლიტიკური გავლენა აქვს და აკონტროლებს ლიბანის ყველაზე ძლიერ შეიარაღებულ ძალებს.

ჰეზბოლა დასავლეთის ქვეყნებმა, სპარსეთის ყურის არაბულმა ქვეყნებმა და არაბული ქვეყნების ლიგამ ტერორისტულ ორგანიზაციად აღიარეს.

  • ჰეზბოლა 1980-იანი წლების დასაწყისში ჩამოყალიბდა რეგიონის ყველაზე ძლიერი შიიტური ძალის, ირანის მიერ, რათა ისრაელს დაპირისპირებოდა. იმ დროისთვის, ისრაელის ძალებს ჰქონდათ დაკავებული ლიბანის სამხრეთი ნაწილი, ქვეყანაში სამოქალაქო ომის პერიოდში.
  • როდესაც 2000 წელს ისრაელმა ლიბანიდან ჯარები გამოიყვანა, ჰეზბოლამ განაცხადა, რომ ეს მათი დამსახურება იყო. მას შემდეგ, ჰეზბოლას სამხრეთით ათასობით ჯარისკაცი ჰყავს მობილიზებული.
  • 2006 წელს, ჰეზბოლას მიერ საზღვართან ჩატარებული სისხლიანი რეიდის შემდეგ, ისრაელსა და ჰეზბოლას შორის ომი დაიწყო. ისრაელის ჯარები შეიჭრნენ ლიბანის სამხრეთით და სცადეს ჰეზბოლას განადგურება.
  • თუმცა, დაჯგუფებამ გადარჩენა მოახერხა, მას შემდეგ კიდევ უფრო გაზარდა მეომრების რაოდენობა და გააუმჯობესა შეიარაღება.
  • მას ირანი აფინანსებს.

ბოლო ხაზი: გამოცემა Times of Israel წერს, რომ ისრაელი-ჰამასის ომის დაწყებიდან დღემდე, ისრაელმა ჰეზბოლას 150-ზე მეტი წევრი მოკლა.

ისრაელი და ჰეზბოლა, უკვე რამდენიმე თვეა, ერთმანეთს თითქმის ყოველ დღე უხსიან ცეცხლს, ლიბანის საზღვრის გასწვრივ.