მოკლედ: აფხაზეთის საოკუპაციო რეჟიმსა და რუსეთს შორის დადებულ ხელშეკრულებას, ბიჭვინთის აგარაკის რუსეთისთვის გადაცემის შესახებ, იურიდიული ძალა არ აქვს, ამის შესახებ საქართველოს საგარეო საქმეთა სამინისტრო აცხადებს.

დეტალები: საგარეო უწყება მიიჩნევს, რომ ამ შეთანხმების რატიფიკაცია მორიგი უკანონო ქმედებაა და რუსეთის მიერ საქართველოს განუყოფელი რეგიონების ოკუპაციის პოლიტიკას აგრძელებს.

"საერთაშორისო სამართლებრივი თვალსაზრისით ნებისმიერი მსგავსი სახის ე.წ. შეთანხმება იურიდიული ძალის არმქონე და ბათილია. შესაბამისად აფხაზეთის რეგიონის ოკუპაციის პირობებში ტერიტორიის გადაცემაზე გაფორმებულ ე.წ. შეთანხმებას ვერ ექნება რაიმე სახის სამართლებრივი შედეგი.

[...]საგარეო საქმეთა სამინისტრო მოუწოდებს რუსეთს, პატივი სცეს საქართველოს სუვერენიტეტსა და ტერიტორიულ მთლიანობას და შეასრულოს მის მიერ ნაკისრი საერთაშორისო ვალდებულებები, მათ შორის, ევროკავშირის შუამავლობით დადებული 2008 წლის 12 აგვისტოს ცეცხლის შეწყვეტის შეთანხმება", — წერია განცხადებაში.

ბოლო ხაზი: ოკუპირებული აფხაზეთის ე.წ. პარლამენტმა გამთენიისას, "რიგგარეშე სხდომაზე" მოახდინა შეთანხმების რატიფიცირება, რომლის მიხედვით, ბიჭვინთის ყოფილი სახელმწიფო აგარაკი რუსეთს გადაეცა.

მოგვიანებით, დოკუმენტს ხელი მოაწერა ე.წ. პრეზიდენტმა ასლან ბჟანიამ.