ცნობილი სამხრეთკორეელი მსახიობი ლი სან-კიონი სეულის ცენტრალურ პარკში, საკუთარ მანქანაში გარდაცვლილი იპოვეს. მსახიობის ძებნა მას შემდეგ დაიწყეს, რაც მისმა ცოლმა სამართალდამცავებს შეატყობინა, რომ სახლიდან გასულმა ლიმ სახლში ჩანაწერი დატოვა, რომელიც, სავარაუდოდ, მის სუიციდზე მიუთითებდა.

მსახიობმა მსოფლიო აღიარება ოსკაროსან პარაზიტში შესრულებული როლისთვის მოიპოვა. ის სხვადასხვა სამხრეთკორეულ სერიალშიც თამაშობდა, მათ შორის, My Mister, Coffee Prince, Dr. Brain და ა.შ.

მსახიობის წინააღმდეგ მარიხუანისა და სხვა ნარკოტიკული ნივთიერებების მოხმარების ბრალდებით გამოძიება მიმდინარეობდა. გამოძიების ფარგლებში ის სამჯერ დაკითხეს, გასულ შაბათ-კვირას კი მისი დაკითხვა 19 საათის განმავლობაში მიმდინარეობდა.

მსახიობი ამტკიცებდა, რომ ნარკოტიკების მიღება ბარში მოტყუებით აიძულეს. აღსანიშნავია, რომ სამხრეთ კორეას ნარკოტიკებთან დაკავშირებით საკმაოდ მკაცრი კანონმდებლობა აქვს და დანაშაულისთვის 6 თვიდან 14 წლამდე თავისუფლების აღკვეთაა გათვალისწინებული.

ლი სან-კიონი ჟურნალისტებს მცირე ხნით ოქტომბერში გაესაუბრა. მან "უსიამოვნო ინციდენტში აღმოჩენის გამო" საზოგადოებასა და ოჯახის წევრებს ბოდიში მოუხადა.